ໃນລະຫວ່າງ ວັນທີ 28 ກຸມພາ ຫາ ວັນທີ 6 ມີນາ 2022 ນີ້ ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ການຈັດຕັ້ງປະຕິບັດວຽກງານພະລັງງານ ແລະ ບໍ່ແຮ່ ຢູ່ແຂວງອຸດົມໄຊ, ແຂວງ ຫຼວງພະບາງ ແລະ ແຂວງ ວຽງຈັນ. ການເຄື່ອນໄຫວຢູ່ແຕ່ລະບ່ອນນັ້ນ, ໄດ້ຮັບການຕ້ອນຮັບຢ່າງອົບອຸ່ນຈາກຄະນະພັກ, ຄະນະນຳ ແລະ ພະນັກງານ-ລັດຖະກອນ ຂອງພະແນກ ພະລັງງານ ແລະ ບໍ່ແຮ່ -ລັດວິສາຫະກິດໄຟຟ້າລາວ ປະຈຳຢູ່ແຕ່ລະແຂວງ. ພ້ອມກັນນີ້, ທ່ານ ຮອງລັດຖະມົນຕີ ກໍ່ໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາວຽກງານະລັງງານ ແລະ ບໍ່ແຮ່ ໃນໄລຍະຜ່ານມາໂດຍຫຍ້ໍ ໂດຍສະເພາະແມ່ນການສັງເກດຕີລາຄາດ້ານດີ, ຜົນງານ ແລະ ດ້ານດ່ອນ, ຂໍ້ຂົງຄ້າງທີ່ຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ. ພ້ອມກັນນີ້, ກໍ່ຍັງໄດ້ຮັບຟັງການນຳສະເໜີທິດທາງແຜນການວຽກງານຈຸດສຸມ ແລະ ແຜນງານ, ໂຄງການລະອຽດຢູ່ແຕ່ລະແຂວງ ຈາກຫົວໜ້າພະແນກ ພະລັງງານ ແລະ ບໍ່ແຮ່ ແຂວງ ອຸດົມໄຊ, ຫຼວງພະບາງ ແລະ ແຂວງວຽງຈັນ.
ຫຼັງຈາກນັ້ນ, ທ່ານ ຮອງລັດຖະມົນຕີ ກໍ່ໄດ້ໂອ້ລົມ ແລະ ໃຫ້ທິດຊີ້ນຳຕໍ່ຄະນະພັກ, ຄະນະນຳ ແລະ ພະນັກງານ-ລັດຖະກອນ. ກ່ອນອື່ນ ທ່ານ ຮອງລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການຈັດຕັ້ງປະຕິບັດວຽກງານຂອງແຕ່ລະແຂວງ ທີ່ຍາດມາໄດ້ຜົນສຳເລັດໃນຫຼາຍດ້ານ ດ້ວຍຄວາມຮັບຜິດຊອບສູງ. ພ້ອມກັນນີ້ ທ່ານ ຮອງລັດຖະມົນຕີ ຍັງໄດ້ເນັ້ນໜັກໃຫ້ຄະນະພັກ, ຄະນະນຳ ແລະ ພະນັກງານ-ລັດຖະກອນ ຢູ່ແຕ່ລະແຂວງ ຈົ່ງຍົກສູງພາລະບົດບາດວຽກງານພະລັງງານ ແລະ ບໍ່ແຮ່, ເອົາໃຈໃສ່ຕິດຕາມກວດກາບັນດາໂຄງການລົງທຶນຂອງເອກະຊົນໃຫ້ຖືກຕ້ອງໂປ່ງໃສ, ການປັບປຸງດ້ານບຸກຄະລາກອນເພື່ອໃຫ້ແທດເໝາະກັບໜ້າວຽກຕົວຈິງ, ສູ້ຊົນເຮັດໃຫ້ຕົວເລກຄາດໝາຍບັນລຸຕາມແຜນການ, ການຄຸ້ມຄອງບັນດາໂຄງການລົງທຶນໃຫ້ໄດ້, ນຳໃຊ້ໃຫ້ເປັນເຮັດໃຫ້ມີຄຸນຄ່າສູງທາງດ້ານເສດຖະກິດ, ສົມທົບກັບບໍລິສັດລັດວິສາຫະກິດໄຟຟ້າລາວປັບປຸງກະກຽມຄວາມພ້ອມບໍລິການສັງຄົມໃຫ້ພຽງພໍ ຮັບປະກັນບໍ່ໃຫ້ມີບັນຫາໄຟບໍ່ພໍ, ການຄິດໄລລາຄ່າໄຟຟ້າຕ້ອງຫຼີກລ້ຽງບໍ່ໃຫ້ມີຂໍ້ຜິດພາດ, ຍົກສູງການປະສານງານກັບທ້ອງຖິ່ນຢ່າງເລິກເຊິ່ງ ເພື່ອບໍ່ໃຫ້ເຫີດມີຫາງສຽງຈົ່ມວ່າຂອງສັງຄົມ, ຜົນກະທົບທາງດ້ານສິ່ງແວດລ້ອມ, ຮ່ວມກັບຂະແໜງການກ່ຽວຂ້ອງແກ້ໃຫ້ທັນເວລາ, ປະຕິບັດໜ້າທີ່ຂອງຕົນເອງໃຫ້ມີປະສິດທິພາບ ສ້າງຄວາມສາມັກຄີພາຍໃນໃຫ້ໜັກແໜ້ນ ໄປພ້ອມໆກັບການເສີມຂະຫຍາຍຄວາມເປັນມິດກັບພາຍນອກໃຫ້ແໜ້ນແຟ້ນ, ການປະສານສົມທົບກັບອົງການທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນໃຫ້ມີຄວາມກົ່ມກຽວ ເພື່ອພັດທະນາວຽກງານພະລັງງານ ແລະ ບໍ່ແຮ່ ໃຫ້ມີບາດກ້າວໃໝ່ ແລະ ມີການຫັນປ່ຽນຢ່າງຕັ້ງໜ້າ.
ນອກຈາກພົບປະພະນັກງານ-ຫຼັກແຫຼ່ງແລ້ວ, ທ່ານ ຮອງລັດຖະມົນຕີ ພ້ອມຄະນະ ຍັງໄດ້ລົງຕິດຕາມ, ຊຸກຍູ້ ແລະ ພົບປະຄະນະອຳນວຍການ ແລະ ພະນັກງານ-ກຳມະກອນ ຢູ່ບັນດາໂຄງການຂຸດຄົ້ນ, ປຸງແຕ່ງແຮ່ຄຳ ຂອງບໍລິສັດລາວຊິນຫຼົງບໍ່ແຮ່ ຈຳກັດ ຢູ່ເມືອງປາກແບ່ງ ແຂວງອຸດົມໄຊ; ໂຄງການຂຸດຄົ້ນ ແລະ ປຸງແຕ່ງແຮ່ເຫຼັກຂອງບໍລິສັດ ຊິເອັນຟີຂຸດຄົ້ນບໍ່ແຮ່ ຂາອອກ-ຂາເຂົ້າ ຈຳກັດ ຢູ່ເມືອງຫຼາ ແຂວງ ອຸດົມໄຊ
ໂຄງການຂຸດຄົ້ນ ແລະ ປຸງແຕ່ແຮ່ຄຳ ຢູ່ເຂດຜາປົ່ນ ເມືອງປາກອູ ແຂວງຫຼວງພະບາງ ຂອງບໍລິສັດ ທຽນຈິນ ຫົວຄານ ຈຳກັດ; ໂຄງການຂຸດຄົ້ນຫີນປູນ, ດິນໜຽວ ຢູເຂດນະຄອນຫຼວງພະບາງ ແຂວງຫຼວງພະບາງ ຂອງບໍລິສັດ ຊີມັງຄອນ ຫຼວງພະບາງ ຈຳກັດ; ໂຄງການຂຸດຄົ້ນ, ປຸງແຕ່ງແຮ່ທອງ ແລະ ຫີນກໍ່ສ້າງຢູ່ເມືອງ ຈອມເພັດ ແຂວງ ຫຼວງພະບາງ ຂອງບໍລິສັດ ແມ່ຂອງລີເວີ ຈຳກັດ; ໂຄງການຂຸດຄົ້ນ, ປຸງແຕ່ແຮ່ຊື່ນ ແລະ ສັງກະສີ ຂອງບໍລິສັດ ບັງການບໍ່ແຮ່ ຈຳກັດ ແລະ ໂຄງການຂຸດຄົ້ນ, ປຸງແຕ່ແຮ່ທອງ ຂອງບໍລິສັດຜາແດງອິນດັສທຣີ ຈຳກັດ ຢູ່ເມືອງວັງວຽງ ແຂວງ ວຽງຈັນ; ໂຄງການຂຸດຄົ້ນ, ປຸງແຕ່ງແຮ່ບາຣິດ ຂອງບໍລິສັດ ເພັດທອງຄຳ ບໍ່ແຮ່ ຈຳກັດ ຢູ່ເມືອງໝື່ນ ແຂວງ ວຽງຈັນ ແລະ ໂຄງການຂຸດຄົ້ນ, ປຸງແຕ່ງແຮ່ຄຳ ຂອງບໍລິສັດລາວລີຕູ້ ມາຍນີ້ງ ຈຳກັດ ຢູ່ເມືອງຊະນະຄາມ ແຂວງວຽງຈັນ.
ພາບ ແລະ ຂໍ້ມູນ: ກົມຄຸ້ມຄອງບໍ່ແຮ່
ຂ່າວ: ຄຳແສງ ແກ້ວປະເສີດ
