ລະຫວ່າງວັນທີ 1 – 6 ມີນາ 2022 ຜ່ານມານີ້, ຄະນະວິຊາການຈາກ ກົມຄຸ້ມຄອງບໍ່ແຮ່, ກະຊວງ ພະລັງງານ ແລະ ບໍ່ແຮ່ ນຳໂດຍ ທ່ານ ນາງ ອຳວຽງ ເພົ້າວົງໄຊ ຮອງຫົວໜ້າກົມຄຸ້ມຄອງບໍ່ແຮ່ ພ້ອມຄະນະໄດ້ເຄື່ອນໄຫວເຮັດວຽກ ແລະ ຊຸກຍູ້ການຈັດຕັ້ງປະຕິບັດວຽກງານວິຊາສະເພາະຢູ່ແຂວງ ບໍ່ແກ້ວ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ພອນສີ ນໍ່ມາລີ ຫົວໜ້າ ພະແນກພະລັງງານ ແລະ ບໍ່ແຮ່ ແຂວງບໍ່ແກ້ວ ຢູ່ຫ້ອງປະຊຸມຂອງພະແນກພະລັງງານ ແລະ ບໍ່ແຮ່.
ໃນໂອກາດດັ່ງກ່າວ ທ່ານ ນາງ ອຳວຽງ ເພົ້າວົງໄຊ ຮອງຫົວໜ້າກົມຄຸ້ມຄອງບໍ່ແຮ່ ໄດ້ແຈ້ງຈຸດປະສົງຂອງການລົງເຄື່ອນໄຫວ, ຊຸກຍູ້ ການຈັດຕັ້ງປະຕິບັດວຽກງານການຄຸ້ມຄອງບໍ່ແຮ່ຢູ່ ແຂວງບໍ່ແກ້ວ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ຈາກນັ້ນ, ທ່ານ ພອນສີ ນໍ່ມາລີ ຫົວໜ້າ ພະແນກພະລັງງານ ແລະ ບໍ່ແຮ່ ແຂວງບໍ່ແກ້ວ ໄດ້ຕາງໜ້າໃຫ້ຄະນະພັກ, ຄະນະພະແນກ ແລະ ພະນັກງານ-ລັດຖະກອນພາຍໃນພະແນກ ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະວິຊາການຈາກກົມຄຸ້ມຄອງບໍ່ແຮ່ ທີ່ໄດ້ລົງຊຸກຍູ້ການຈັດຕັ້ງປະຕິບັດວຽກງານບໍ່ແຮ່ ຢູ່ແຂວງບໍ່ແກ້ວ. ພ້ອມກັນນີ້, ທ່ານ ຫົວໜ້າພະແນກ ກໍ່ໄດ້ລາຍງານຫຍໍ້ກ່ຽວກັບຜົນສຳເລັດ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດ ແລະ ການຄຸ້ມຄອງວຽກງານບໍ່ແຮ່ ຢູ່ພາຍໃນແຂວງ.
ພາຍຫຼັງການພົບປະປຶກສາຫາລືກັນ ຄະນະວິຊາການຈາກກົມຄຸ້ມຄອງບໍ່ແຮ່, ພະແນກພະລັງງານ ແລະ ບໍ່ແຮ່ແຂວງ ແລະ ຫ້ອງການພະລັງງານ ແລະ ບໍ່ແຮ່ ເມືອງ ກໍ່ໄດ້ພ້ອມກັນລົງຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດວຽກງານ ຂອງບັນດາບໍລິສັດ ທີ່ດຳເນີນການຂຸດຄົ້ນ ແລະ ປຸງແຕ່ງແຮ່ທາດ ຢູ່ແຂວງບໍ່ແກ້ວ, ໃນນີ້, ມີໂຄງການຂຸດຄົ້ນ ແລະ ປຸງແຕ່ງແຮ່ທາດ ທີ່ສູນກາງອອກອະນຸຍາດ ພາຍໃນແຂວງບໍ່ແກ້ວ ຈຳນວນ 1 ບໍລິສັດ, 1 ກິດຈະການ ແລະ ບັນດາໂຄງການທີ່ທ້ອງຖິ່ນອອກອະນຸຍາດອີກຈຳນວນໜຶ່ງ.
ພ້ອມກັນນີ້, ທ່ານ ຮອງຫົວໜ້າກົມຄຸ້ມຄອງບໍ່ແຮ່ ຍັງໄດ້ນຳເອົາອຸປະກອນປ້ອງກັນຄວາມປອດໄພສ່ວນບຸກຄົນ ນຳມາມອບໃຫ້ ພະແນກພະລັງງານ ແລະ ບໍ່ແຮ່ ແຂວງບໍ່ແກ້ວຕື່ມອີກຈຳນວນ 2 ຊຸດ ເພື່ອນຳໃຊ້ເຂົ້າໃນວຽກງານການຕິດຕາມກວດກາໂຄງການ ໂດຍການກ່າວຮັບຂອງ ທ່ານ ຫົວໜ້າພະແນກ ພະລັງງານ ແລະ ບໍ່ແຮ່ ແຂວງ ບໍ່ແກ້ວ.
ພາບ ແລະ ແຫຼ່ງຂ່າວ: ກົມຄຸ້ມຄອງບໍ່ແຮ່
ຂ່າວ: ຄຳແສງ ແກ້ວປະເສີດ
