ເພື່ອບຸກທະລຸດ້ານແບບແຜນການເຄື່ອນໄຫວ, ວິທີນໍາພາ, ວິທີການເຮັດວຽກ ແລະ ວຽກງານພັກ-ພະນັກງານຂອງຂະແໜງພະລັງງານ ແລະ ບໍ່ແຮ່ ຢູ່ແຂວງອຸດົມໄຊ, ໂດຍສະເພາະ ແມ່ນການສຸ່ມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງອຸດົມໄຊ, ແຜນພັດທະນາເສດຖະກິດ-ສັງຄົມແຫ່ງຊາດກໍຄືຂອງແຂວງ ອຸດົມໄຊ ແລະ ແຜນພັດທະນາພະລັງງານ ແລະ ບໍ່ແຮ່ 05 ປີ(2021-2025) ກະຊວງພະລັງງານ ແລະ ບໍ່ແຮ່. ພ້ອມດຽວກັນນີ້, ກໍແມ່ນການຈັດຕັ້ງປະຕິບັດຕາມຄໍາສັ່ງຂອງຄະນະເລຂາທິການສູນກາງພັກ ແລະ ຄໍາແນະນໍາຂອງນາຍົກລັດຖະມົນຕີ ກ່ຽວກັບ ວຽກງານປັບປຸງການຈັດຕັ້ງ ແລະ ວຽກງານພັກ-ພະນັກງານໃນໄລຍະໃໝ່ ຕິດພັນກັບສອງວາລະແຫ່ງຊາດ ໃຫ້ດຳເນີນໄປດ້ວຍຄວາມສອດຄ່ອງຕາມ ແນວທາງນະໂຍບາຍ, ລະບຽບການ ແລະ ກົດໝາຍ ຮັບປະກັນການຈັດຕັ້ງປະຕິບັດໃຫ້ ມີຄວາມກົມກ່ຽວ, ເຊື່ອມສານ ແລະ ໄດ້ຮັບໝາກຜົນ.
ດັ່ງນັ້ນ, ລະຫວ່າງວັນທີ 1-3 ສິງຫາ 2022 ຜ່ານມານີ້, ທ່ານ ອາລຸນ ບຸນວິໄລ ເລຂາຄະນະພັກຮາກຖານ, ຫົວໜ້າພະແນກພະລັງງ ແລະ ບໍ່ແຮ່ ພ້ອມຄະນະແພກ ແລະ ພະນັກງານວິຊາການ ຂອງພະແນກພະລັງງ ແລະ ບໍ່ແຮ່ ແຂວງ ອຸດົມໄຊ ໄດ້ລົງຈັດກອງປະຊຸມຢູ່ 03 ເມືອງຄື: ເມືອງ ແບງ, ເມືອງ ຮຸນ ແລະ ເມືອງ ປາກແບງ ເພື່ອນຳສະເໜີ, ເຜີຍແຜ່ແຜນພັດທະນາວຽກງານພະລັງງານ ແລະ ບໍ່ແຮ່ໄລຍະ 5 ປີຄັ້ງທີ 9 (2021-2025), ນິຕິກໍາໃຕ້ກົດໝາຍ ເປັນຕົ້ນແມ່ນ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງແຮ່ທາດອະໂລຫະສຳລັບການກໍ່ສ້າງ ແລະ ອຸດສາຫະກຳ ພາຍໃນແຂວງ ອຸດົມໄຊ ຕິດພັນກັບການຈັດສົ່ງ ແລະ ມອບ-ຮັບ ພະນັກງານ-ລັດຖະກອນ ຂອງພະແນກ ພະລັງງານ ແລະ ບໍ່ແຮ່ ລົງໄປຊ່ວຍເມືອງ ແບງ ແລະ ເມືອງ ຮຸນ, ເຊິງມີ ບັນດາ ທ່ານ ການນຳພັກ-ລັດ ເປັນຕົ້ນແມ່ນ ບັນດາ ສະຫາຍ ຮອງເລຂາພັກເມືອງ, ກຳມະການພັກເມືອງ, ບັນດາ ທ່ານ ຮອງເຈົ້າເມືອງ,ຫົວໜ້າ,ຮອງຫົວໜ້າ ຫ້ອງການ, ສອງກຳລັງ ປກສ-ປກຊ, ອົງການທຽບເທົ່າ ແລະ ພະນັກງານ ຫຼັກແຫຼ່ງເຂົ້າຮ່ວມ ຢ່າງພ້ອມພຽງ.
ໃນໂອກາດລົງເຄື່ອນໄຫວເຮັດວຽກຢູ່ເມືອງ ແບງ ແລະ ເມືອງ ຮຸນ ທ່ານ ຫົວໜ້າພະແນກ ພ້ອມດ້ວຍຄະນະຍັງໄດ້ເຂົ້າຮ່ວມພິທີມອບ-ຮັບໂຄງການກໍ່ສ້າງຕາຂ່າຍໄຟຟ້າລະບົບ 12,7 ແລະ 0,4 ກິໂລໂວນ ເຂົ້າເຂດຈຸດສຸ່ມພັດທະນາຂອງ ແຂວງ ກໍຄືຂອງ ເມືອງ, ໂດຍສະເພາະແມ່ນ ເມືອງ ແບງ ແລະ ເມືອງ ຮຸນ ເຊິງປະກອບມີ 03 ບ້ານ : ເຂດຈຸດສຸ່ມ ນາໂຮມ ເມືອງ ແບງ, ບ້ານ ສົມໄຊ ແລະ ບ້ານ ນໍ້ານອງ ເມືອງຮຸນ, ລວມມູນຄ່າທັງໜົດ 543.590.034 ກີບ ເຊິ່ງໄດ້ນຳໃຊ້ທຶນພັດທະນາທ້ອງຖິ່ນ ແລະ ສັງຄົມຂອງການລົງທຶນດ້ານພະລັງງານ ແລະ ບໍ່ແຮ່ ແລະ ເປີດໄຟຟ້າໃຫ້ ພໍແມ່ປະຊາຊົນໄດ້ຊົມໃຊ້ແລ້ວ.
ພ້ອມດຽວກັນນິີ້, ທ່ານ ຫົວໜ້າພະແນກ ກໍ່ໄດ້ໃຫ້ກຽດໂອ້ລົມ ແລະ ພົບປະກັບອຳນາດການປົກຄອງບ້ານ ແລະ ພໍ່ແມ່ປະຊາຊົນ ເພື່ອໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ-ລັດ ໂດຍສະເພາະ ແມ່ນ ສະພາບການພັດທະນາເສດຖະກິດສັງ-ຄົມຂອງຊາດ ກໍຄືຂອງແຂວງ ແລະ ເມືອງ, ພ້ອມທັງເນັ້ນໜັກໃຫ້ ພໍ່ແມ່ປະຊາຊົນ ຈົ່ງນໍາໃຊ້ໄຟຟ້າຢ່າງປະຍັດ ຊົມໃຊ້ໃຫ້ມີປະສິດທິພາບ-ປະສິດທິຜົນ, ນຳໃຊ້ໃຫ້ຖືກຕ້ອງ-ມີຄວາມປອດໄພ ແລະ ນໍາໃຊ້ເຂົ້າໃນການຜະລິດເປັນສິນຄ້າ ເພື່ອແກ້ໄຂຄວາມທຸກຍາກ ຂອງຄອບຄົວ ໃນຕໍ່ໜ້າ.
ພາບ ແລະ ຂ່າວ: ພບ ແຂວງອຸດົມໄຊ
ຮຽບຮຽງຂ່າວ: ຄຳແສງ ແກ້ວປະເສີດ
