ຕອນບ່າຍ ວັນທີ 06 ກັນຍາ 2022, ທີ່ຫ້ອງຮັບແຂກ ກະຊວງພະລັງງານ ແລະ ບໍ່ແຮ່, ທ່ານ ທອງພັດ ອິນທະວົງ ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່ ພ້ອມຄະນະ ໄດ້ຕ້ອນຮັບ ແລະ ພົບປະ ທ່ານ ພູທົງ ຄຳມະນີວົງ, ຮອງເຈົ້າແຂວງສາລະວັນ ພ້ອມດ້ວຍຄະນະພະແນກຂອງແຂວງ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ຮອງລັດຖະມົນຕີ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ ທ່ານ ຮອງເຈົ້າແຂວງ ທີ່ໄດ້ເຂົ້າມາພົບປະ ແລະ ເຮັດວຽກຮ່ວມກັບກະຊວງ ພະລັງງານ ແລະ ບໍ່ແຮ່, ໂດຍການພົບປະປຶກສາຫາລືກັນຄັ້ງນີ້, ທັງສອງຝ່າຍໄດ້ພ້ອມກັນທົບທວນຄືນການຈັດຕັ້ງປະຕິບັດບັນດາໂຄງການດ້ານພະລັງງານ ແລະ ບໍ່ແຮ່ ຢູ່ພາຍໃນແຂວງ ສາລະວັນ ໂດຍສະເພາະແມ່ນ ໂຄງການດ້ານພະລັງງານ ເຊັ່ນ ພະລັງງານ ລົມ ແລະ ພະລັງງານແສງຕາເວັນ, ເຊິ່ງໄດ້ຈັດຕັ້ງປະຕິບັດຢ່າງເປັນຮູບປະທຳ. ພ້ອມກັນນີ້ ທັງສອງຝ່າຍຍັງສືບຕໍ່ຍົກລະດັບການຮ່ວມມື ແລະ ສືບຕໍ່ການຈັດຕັ້ງປະຕິບັດ ໃນວຽກງານພະລັງງານ ແລະ ບໍ່ແຮ່ ໃນຕໍ່ໜ້າ.
ພາບ-ຂ່າວ: ສົມສະໜຸກ
