ເພື່ອສ້າງຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ແນວທາງນະໂຍບາຍຂອງພັກ, ລັດຖະບານ ໃນການພັດທະນາໂຄງການບໍ່ແຮ່ ໂດຍສະເພາະແມ່ນໂຄງການທົດລອງຂຸດຄົ້ນແຮ່ຄຳຕົກຂ້ອນ ເຊິ່ງເປັນໜຶ່ງໃນນະໂຍບາຍຂອງລັດຖະບານ ເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຢູ່ປະເທດພວກເຮົາ. ມາໃນວັນທີ 26 ຕຸລາ 2022 ຜ່ານມານີ້, ຢູ່ທີ່ຫ້ອງປະຊຸມ ຂອງຫ້ອງວ່າການເມືອງເຟືອງ, ແຂວງວຽງຈັນ ກົມຄຸ້ມຄອງບໍ່ແຮ່ ໄດ້ຈັດກອງປະຊຸມເຜີຍແຜ່ເນື້ອໃນສັນຍາສໍາປະທານຂຸດຄົ້ນຄໍາຕົກຂ້ອນ ແບບທົດລອງ ຢູ່ເຂດບ້ານນາກາງ, ເມືອງເຟືອງ, ແຂວງວຽງຈັນ ລະຫວ່າງ ລັດຖະບານ ແຫ່ງ ສປປ ລາວ ກັບ ບໍລິສັດ ສົມວິຈິດ ຂຸດຄົ້ນບໍ່ແຮ່ ຈໍາກັດ ເຊິ່ງລົງນາມໃນວັນທີ 23 ສິງຫາ 2022, ໃນເນື້ອທີ່ 2 ເຮັກຕາ, ພາຍໃຕ້ການເປັນປະທານຮ່ວມຂອງ ທ່ານ ອາດ ວິໄລພົນ ຫົວໜ້າຫ້ອງວ່າການປົກຄອງເມືອງເຟືອງ ແລະ ທ່ານ ນາງ ອໍາວຽງ ເພົ້າວົງໄຊ ຮອງຫົວໜ້າກົມຄຸ້ມຄອງບໍ່ແຮ່, ມີຜູ້ຕາງໜ້າຈາກ ກະຊວງການເງິນ, ກະຊວງແຜນການ ແລະ ການລົງທຶນ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ພາກສ່ວນທີ່ກ່ຽວຂ້ອງຂອງທ້ອງຖິ່ນ, ບ້ານທີ່ໂຄງການຕັ້ງຢູ່ ແລະ ບໍລິສັດເຂົ້າຮ່ວມ. ສ່ວນໃນການປັກຫຼັກໝາຍນັ້ນແມ່ນພະແນກພະລັງງານ ແລະ ບໍ່ແຮ່ ແຂວງ ເປັນຜູ້ຈັດຕັ້ງປະຕິບັດ.
