ງານມະຫາກຳກິລາແຫ່ງຊາດຄັ້ງທີ XI ໄດ້ເປີດສາກຂຶ້ນຢ່າງຍິ່ງໃຫຍ່

          ພາຍຫລັງໄດ້ກະກຽມມາຫລາຍປີ, ມາໃນຕອນແລງຂອງວັນທີ 13 ທັນວາ ນີ້, ງານມະຫາກຳກິລາແຫ່ງຊາດ ຄັ້ງທີ XI ເຊິ່ງເປັນງານແຂ່ງຂັນກິລາທີ່ຍິ່ງໃຫຍ່ຂອງປະເທດພວກເຮົາ ກໍ່ໄດ້ເປີດສາກຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມກ່າວເປີດງານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ. ມີການນຳພັກ, ລັດ ຈາກສູນກາງ ແລະ ທ້ອງຖິ່ນ ພ້ອມດ້ວຍຄະນະນຳ, ຄູຝຶກ ແລະ ນັກກິລາຈາກ 17 ແຂວງ, 1 ນະຄອນຫລວງ, 4 ກະຊວງ ແລະ ມວນຊົນຊາວແຂວງຊຽງຂວາງເຂົ້າຮ່ວມຢ່າງຫລວງຫລາຍ

             ງານມະຫາກຳກິລາແຫ່ງຊາດຄັ້ງນີ້ ມີນັກກິລາເຂົ້າຮ່ວມທັງໝົດ 3.093 ຄົນ, ໃນ 25 ປະເພດກິລາຄື: ຍິງປືນ, ລອຍນໍ້າ, ບານບ້ວງ, ເທຄວັນໂດ, ໝາກແລ້, ຍິງທະນູ, ໜ້າເກັກ, ແລ່ນ-ລານ, ມວຍສາກົນ, ໝາກເສິກ, ປັນຈັກສິລັດ, ມວຍປໍ້າ, ຄາຣາເຕໂດ, ກະຕໍ້-ຊິນລອນ, ບານເຕະ, ໝາກຂ່າງ, ເປຕັງ, ກ໋ອບ, ດອກປີກໄກ່, ເທັນນິສ, ລົດຖີບ, ປິ໋ງປ໋ອງ, ມວຍລາວ, ຢູໂດ ແລະ ວູຊູ. ມີການຊີງໄຊຫຼຽນລາງວັນທັງໝົດ 2.598 ຫຼຽນ

             ສຳລັບການນຳກະຊວງ ພະລັງງານ ແລະ ບໍ່ແຮ່ ເຂົ້າຮ່ວມພິທີເປີດງານມະຫາກຳກິລາແຫ່ງຊາດ ຄັ້ງທີ XI ໂດຍແມ່ນ ສະຫາຍ ປອ ດາວວົງ ພອນແກ້ວ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່, ນອກຈາກນີ້ຍັງມີຄະນະນຳ, ຄູຝຶກ ແລະ ນັກກິລາ ເຂົ້າຮ່ວມ 100 ກວ່າຄົນ.

ໂດຍ: ຄຳແສງ ແກ້ວປະເສີດ