ໃນວັນທີ 8-9 ທັນວາ 2022 ທີ່ຜ່າມາ, ກົມຈັດຕັ້ງ ແລະ ພະນັກງານ, ກະຊວງ ພະລັງງານ ແລະ ບໍ່ແຮ່, ໄດ້ຈັດຊຸດຝຶກອົບຮົມຂື້ນໃນຫົວຂໍ້”ວຽກງານການວິເຄາະ, ການພັດທະນາການຈັດຕັ້ງ ແລະ ການກຳນົດຕຳແໜ່ງງານ” ຂື້ນ ທີ່ຫ້ອງປະຊຸມ ຊັ້ນ 5 ຕຶກກະຊວງ, ໂດຍໃຫ້ກຽດເປັນປະທານກ່າວດເປີດ ໂດຍທ່ານ ມ້ອນ ເພັດພູໄທ, ຮອງຫົວໜ້າກົມຈັດຕັ້ງ ແລະ ພະນັກງານ, ໂດຍມີຜູ້ເຂົ້າຮ່ວມຈາກ ຫ້ອງການກະຊວງ, ຈາກບັນດາກົມ, ສະຖາບັນ ແລະ ພະແນກ ພະລັງງານ ແລະ ບໍ່ແຮ່ ນະຄອນຫຼວງ ແລະ ພບ ແຂວງ ເຂົ້າຮ່ວມກວ່າ 50 ກວ່າທ່ານ.
ທ່ານປະທານຍັງໄດ້ກ່າວຕື່ມຕໍ່ກອງປະຊຸມວ່າ: ການຈັດກອງປະຊຸມຝຶກອົບຮົມຂອງພວກເຮົາໃນຄັ້ງນີ້ ແມ່ນມີຄວາມໝາຍອັນສຳຄັນ ແລະ ມີຄວາມຈຳເປັນຫຼາຍທີ່ສຸດ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ເວົ້າລວມ, ເວົ້າສະເພາະແມ່ນ ມະຕິກອງປະຊຸມໃຫ່ຍ ຄັ້ງທີ III ຂອງອົງຄະນະພັກກະຊວງພະລັງງານ ແລະ ບໍ່ແຮ່ ຂອງພວກເຮົາໃຫ້ປະກົດຜົນເປັນຈິງ. ນັບແຕ່ຂະແໜງການຂອງພວກເຮົາໄດ້ສຳເລັດການປັບປຸງກົງຈັກຂອງກະຊວງໃນໄລຍະຜ່ານມາຄື: ການປັບປຸງດຳລັດວ່າການຈັດຕັ້ງ ແລະ ການເຄື່ອນໄຫວຂອງກະຊວງພະລັງງານ ແລະ ບໍ່ແຮ່ ສະບັບເລກທີ 296/ນຍ, ລົງວັນທີ 04/09/2017 ມາເປັນດຳລັດສະບັບເລກທີ 624/ນຍ, ລົງວັນທີ 22/10/2021 ກະຊວງຂອງພວກເຮົາໄດ້ສືບຕໍ່ປັບປຸງກົງຈັກຊ່ວຍວຽກໂດຍໄດ້ຮັບຜົນສຳເລັດໃນຂັ້ນສູນກາງ,
ເຊິ່ງໃນແຕ່ກ່ອນ ຕາມດຳລັດ 296/ນຍ, ປະກອບມີ: 1 ຫ້ອງການກະຊວງ, 9 ກົມ ແລະ 2 ສະຖາບັນ ປະກອບມີ 70 ພະແນກ ແລະ ມີ ພະແນກການສາຍຕັ້ງ 17 ແຂວງ ແລະ 1 ນະຄອນຫຼວງ ແລະ ຫ້ອງການພະລັງງານ ແລະ ບໍ່ແຮ່ ຂັ້ນເມືອງ 135 ເມືອງ. ພາຍຫຼັງປັບປຸງມາເປັນດຳລັດ 624/ນຍ ແລ້ວ ກົງຈັກຊ່ວຍວຽກຂັ້ນກະຊວງ ປະກອບມີ: 1 ຫ້ອງການກະຊວງ, 10 ກົມ ແລະ 1 ສະຖາບັນ ປະກອບມີ: 57 ພະແນກ, 4 ສູນ ແລະ 1 ກອງ. ເມື່ອທຽບໃສ່ກົງຈັກຊ່ວຍວຽກຂັ້ນກົມ ແມ່ນຫຼຸດຈາກອັນເອົາ 8 ພະແນກ ທັງນີ້ແມ່ນເພື່ອປະຕິບັດຕາມ:
ດັ່ງບັນດາທ່ານຮັບຊາບນຳກັນແລ້ວວ່າ ພັກເຮົາ ຍາມໃດກໍຖືສຳຄັນຕໍ່ວຽກງານການປັບປຸງກົງຈັກການຈັດຕັ້ງທົ່ວລະບົບການເມືອງ ຊຶ່ງແມ່ນວຽກງານໜຶ່ງທີ່ສຳຄັນຂອງພັກເຮົາ ໃນຖານະເປັນພັກກຳອຳນາດ ດ້ວຍການກຳນົດແນວທາງນະໂຍບາຍ ກ່ຽວກັບ ການປັບປຸງກົງຈັກການຈັດຕັ້ງໃຫ້ສອດຄ່ອງ ແລະ ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນການພັດທະນາເສດຖະກິດ-ສັງຄົມໃນແຕ່ະລະໄລຍະ ແລະ ການເຊື່ອມໂຍງກັບບັນດາປະເທດພາກພື້ນສາກົນ ແລະ ບັນດາປະເທດຄູ່ຮ່ວມພັດທະນາ. ໃນປະຈຸບັນເຫັນໄດ້ວ່າ ການປັບປຸງກົງຈັກການຈັດຕັ້ງຍັງມີຫຼາຍດ້ານທີ່ຕ້ອງສືບຕໍ່ປັບປຸງແກ້ໄຂໃຫ້ຂາດຕົວ ເພື່ອເຮັດໃຫ້ການປັບປຸງກົງຈັກການຈັດຕັ້ງໃນທົ່ວລະບົບການເມືອງດຳເນີນໄປໄດ້ຢ່າງຖືກຕ້ອງຕາມທິດກະທັດຮັດ, ສົມເຫດສົມຜົນ ແລະ ສອດຄ່ອງກັບສະພາບຕົວຈິງ ຂະແໜງໜຶ່ງໃຫ້ຮັບຜິດຊອບຫຼາຍວຽກ ວຽກໃດຄ້າຍຄືກັນໃຫ້ໂຮມເຂົ້າກັນ ເຮັດໃຫ້ຂະໜາດກົງຈັກບໍ່ໃຫ່ຍໂຕ, ການຈັດຕັ້ງມີຄວາມໜັກແໜ້ນ, ເຂັ້ມແຂງ, ລັດຖະກອນມີຈຳນວນຫຼຸດລົງ ຄຸນນະພາບເພີ່ມຂຶ້ນ ສາມາດປະຕິບັດໜ້າທີ່ການເມືອງທີ່ໄດ້ຮັບມອບໝາຍຢ່າງມີປະສິດທິພາບ ແລະ ປະສິດທິຜົນສູງ.
