ໃນລະຫວ່າງ 22-24 ພະຈຶກ 2023 ກະຊວງພະລັງງານ ແລະ ບໍ່ແຮ່ ຮ່ວມກັບ ບໍລິສັດ ມອນຊູນ ວິນພາວເວີ ຈຳກັດ ໄດ້ຈັດພິທີສອບເສັງຂື້ນ ຢູ່ທີ່ເມືອງ ດາກຈຶງ, ແຂວງ ເຊກອງ ແລະ ເມືອງ ຊານໄຊ, ແຂວງ ອັດຕະປື ເພື່ອຄັດເລືອກເອົານ້ອງນັກຮຽນ ທີ່ຈະໄດ້ຮັບທຶນການສຶກສາຈາກໂຄງການ ໄຟຟ້າພະລັງງານລົມ ມອນຊູນ ເປັນທຶນການສຶກສາລະດັບປະລິນຍາຕີ ທີ່ປະເທດໄທ ໃນສົກປິ 2024 ຈຳນວນ 5 ທຶນ. ໃຫ້ກຽດເຂົ້າຮ່ວມເປັນປະທານໃນພິທີຂອງທ່ານ ທອງຂັນ ພິມວິໄລ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງ ພະລັງງານ ແລະ ບໍ່ແຮ່; ບັນດາທ່ານຜູ້ຕາງໜ້າ ຈາກພະແນກພະລັງງານ ແລະ ບໍ່ແຮ່ ແຂວງ, ພະແນກສຶກສາທິການ ແລະ ກິລາແຂວງ, ຫ້ອງການ ພະລັງງານ ແລະ ບໍ່ແຮ່ ເມືອງ, ຫ້ອງການສຶກສາ ແລະ ກິລາເມືອງ ແລະ ຜູ້ຕາງໜ້າຈາກບໍລິສັດມອນຊູນວິນພາວເວີຈຳກັດ. ນອກຈາກນີ້, ຍັງມີອາຈານຈາກມະຫາວິທະຍາໄລອຸບົນລາດຊະທານີ ປະເທດໄທ ກໍ່ໃຫ້ກຽດເຂົ້າຮ່ວມໃນພິທີດັ່ງກ່າວ ພ້ອມດ້ວຍນ້ອງໆນັກຮຽນທີ່ມີສິດ ເຂົ້າສອບເສັງ-ຄັດເລືອກ ຕາມມາດຖານເງື່ອນໄຂທີ່ກຳນົດ ຈຳນວນ 22 ຄົນ, ຍິງ 11 ຄົນ ໃນນັ້ນນ້ອງນັກຮຽນທີ່ມີສິດເຂົ້າສອບເສັງຈາກເມືອງ ດາກຈຶງ ມີ ຈຳນວນ 14 ຄົນ ຍິງ 09 ຄົນ, ໂດຍສອບເສັງ- ຄັດເລືອກແອົາພຽງແຕ່ 4 ຄົນ ທີ່ຈະໄດ້ຮັບທຶນ ແລະ ນ້ອງນັກຮຽນທີ່ມີສິດເຂົ້າສອບເສັງຈາກເມືອງ ຊານໄຊ ຈຳນວນ 08 ຄົນ ຍິງ 02 ຄົນ ໂດຍຄັດເລືອກເອົາພຽງ 1 ຄົນ ທີ່ຈະໄດ້ຮັບທຶນ.
