ລະຫວ່າງວັນທີ 9-19 ມັງກອນ 2024 ນີ້, ອົງຄະນະພັກກະຊວງພະລັງງານ ແລະ ບໍ່ແຮ່ ຮ່ວມກັບຄະນະຈັດຕັ້ງສູນກາງພັກ ໄດ້ຈັດຊຸດຝຶກອົບວຽກງານຈັດຕັ້ງ ກໍ່ສ້າງພັກ-ພະນັກງານ ຊຸດທີ່ III ໃຫ້ພະນັກງານຫຼັກແຫຼ່ງອ້ອມຂ້າງອົງຄະນະພັກກະຊວງຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມເປັນປະທານ ແລະ ກ່າວເປີດພິທີຂອງ ສະຫາຍ ທອງຂັນ ພິມວິໄລ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ, ກະຊວງພະລັງງານ ແລະ ບໍ່ແຮ່ ແລະ ສະຫາຍ ນ ວິໄລວັນ ເພັງສະຫວັດ ຫົວໜ້າສູນພັດທະນາວຽກງານຈັດຕັ້ງ, ຄະນະຈັດຕັ້ງສູນກາງພັກ. ມີບັນດາ ສະຫາຍ ຄະນະພັກກະຊວງ, ຜູ້ຕາງໜ້າຈາກຄະນະຈັດຕັ້ງສູນກາງພັກ ພ້ອມດ້ວຍພະນັກງານ-ຫຼັກແຫຼ່ງພາຍໃນອົງຄະນະພັກກະຊວງທີ່ມາຈາກໜ່ວຍພັກຫ້ອງການກະຊວງ, ບັນດາກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງເຂົ້າຮ່ວມ.
ຊຸດຝຶກອົບຮົມຄັ້ງນີ້ຈະໄດ້ພ້ອມກັນສຸມໃສ່ຮັບຟັງການເຜີຍແຜ່ ແລະ ຄົ້ນຄວ້າ-ເຊື່ອມຊຶມເພື່ອກຳແໜ້ນ ເນື້ອໃນເອກະສານທີ່ສຳຄັນຊຶ່ງມີ 15 ຫົວຂໍ້ດັ່ງນີ້ : ທັດສະນະຂອງພັກເຮົາ ກ່ຽວກັບວຽກງານກໍ່ສ້າງພັກ, ລະບົບການເມືອງຂອງ ສປປ ລາວ ໃນເງື່ອນໄຂໃໝ່, ແບບແຜນນໍາພາ ແລະ ຫຼັກການລວມສູນປະຊາທິປະໄຕຂອງພັກ, ກ່ຽວກັບການດໍາເນີນຊີວິດຂອງໜ່ວຍພັກ, ຍົກສູງຄຸນນະພາບຂອງການຈັດຕັ້ງຮາກຖານພັກ, ຍົກສູງຄຸນນະພາບວຽກງານຄຸ້ມຄອງສະມາຊິກພັກ, ຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກ, ກ່ຽວກັບວຽກງານປ້ອງກັນພັກ-ພະນັກງານໃນໄລຍະໃໝ່, ການກະກຽມ ແລະ ດໍາເນີນກອງປະຊຸມໃຫຍ່ຂອງພັກ, ທິດສະດີກ່ຽວກັບວຽກງານຈັດຕັ້ງ ແລະ ການສ້າງໂຄງຮ່າງການຈັດຕັ້ງ, ທັດສະນະຂອງພັກຕໍ່ພະນັກງານ ແລະ ຕໍ່ວຽກງານພະນັກງານ, ກ່ຽວກັບວຽກງານຄຸ້ມຄອງພະນັກງານ, ການສ້າງແຜນກໍານົດພະນັກງານນໍາພາ-ຄຸ້ມຄອງ, ການສ້າງແຜນກໍ່ສ້າງ-ບໍາລຸງພະນັກງານນໍາພາ-ຄຸ້ມຄອງ ແລະ ການສ້າງມາດຕະຖານພະນັກງານ.
ພາບ: ລຸ້ງຟ້າ ອົບພະຈັນ
ຂ່າວ: ມີລູ່ ຄຳປະເສີດ
ຮຽບຮຽງ: ຄຳແສງ ແກ້ວປະເສີດ
Website: www.mem.gov.la
ສາຍດ່ວນ: 1506
