ກອງປະຊຸມໄດ້ຈັດຂຶ້ນໃນວັນທີ 29 ມີນາ 2023 ຢູ່ເມືອງວັງວຽງ, ແຂວງວຽງຈັນ ພາຍໃຕ້ການເປັນປະທານຂອງ ທ່ານ ຄຳໂສ້ ກຸໂພຄຳ ຫົວໜ້າຫ້ອງການກະຊວງພະລັງງານ ແລະ ບໍ່ແຮ່, ມີຜູ້ຕາງໜ້າ ຈາກກະຊວງການເງິນ, ບັນດາກົມ ແລະ ສະຖາບັນ ອ້ອມຂ້າງກະຊວງພະລັງງານ ແລະ ບໍ່ແຮ່ ເຂົ້າຮ່ວມ ຈຳນວນ 36 ທ່ານ.
ກອງປະຊຸມຄັ້ງນີ້, ຈັດຂຶ້ນເພື່ອທົບທວນຄືນການຈັດຕັ້ງປະຕິບັດວຽກງານການເງິນຂອງຂະແໜງການພະລັງງານ ແລະ ບໍ່ແຮ່ ເປັນຕົ້ນແມ່ນ: ບົດສະຫຼຸບການຈັດຕັ້ງປະຕິບັດວຽກງານການເງິນ ປະຈໍາປີ 2022 ແລະ ແນະນຳການຈັດຕັ້ງປະຕິບັດແຜນງົບປະມານ ປະຈຳປີ 2023. ພ້ອມກັນນີ້, ກອງປະຊຸມ ຍັງໄດ້ປຶກສາຫາລືເພື່ອ ສະຫລຸບ ແລະ ຖອດຖອນບົດຮຽນ ການຈັດຕັ້ງງົບປະມານປະຈຳປີ 2022 ແລະ ແນະນໍາການຈັ້ງຕັ້ງປະຕິບັດງົບປະມານ ປະຈໍາປີ 2023,
ພ້ອມທັງແລກປ່ຽນ ບົດຮຽນການປະຕິບັດວຽກງານຕົວຈິງໃນການນຳໃຊ້ງົບປະມານແຫ່ງລັດ ແລະ ເພື່ອເປັນການເອກະພາບກັນໃນການຈັດຕັ້ງປະຕິບັດ ງົບປະມານແຫ່ງລັດໃຫ້ໄປໃນທິດທາງ ແລະ ເປົ້າໝາຍອັນດຽວກັນ, ຮັບປະກັນຄວາມ ຖຶກຕ້ອງຕາມລະບຽບກົດ ໝາຍງົບປະມານແຫ່ງລັດ.
ໂດຍ: ມີລູ່ ຄຳປະເສີດ
