ຕອນບ່າຍວັນທີ 30 ມີນາ 2023 ນີ້, ຢູ່ຫ້ອງຮັບແຂກກະຊວງພະລັງງານ ແລະ ບໍ່ແຮ່, ທ່ານ ປີເຕີ ຮາມ໋ອນ ເອກອັກຄະລັດຖະທູດ ສະຫະລັດອາເມລິກາ ປະຈໍາລາວ ໄດ້ເຂົ້າພົບປະ ທ່ານ ປອ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່. ໃນໂອກາດດັ່ງກ່າວນີ້ ທ່ານ ລັດຖະມົນຕີ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານທູດພ້ອມດ້ວຍຄະນະໃນການຢ້ຽມຢາມ ກະຊວງພະລັງງານ ແລະ ບໍ່ແຮ່ ໃນຄັ້ງນີ້. ພ້ອມກັນນີ້, ທ່ານ ລັດຖະມົນຕີ ຍັງໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງສະຫະລັດອາເມລິກາໃນໄລຍະຜ່ານມາ ກໍ່ຄືໃນປັດຈຸບັນ ທີ່ນັບມື້ນັບເພີ່ມຂຶ້ນເລື້ອຍໆ ໂດຍສະເພາະໃນຂົງເຂດພະລັງງານ ແລະ ບໍ່ແຮ່ ນັບຕັ້ງແຕ່ການຢ້ຽມຢາມຂອງ ທ່ານ ປະທານາທິບໍດີ ບາຣັກໂອບາມາ ໃນປີ2016 ເປັນຕົ້ນມາ.
ທ່ານ ປີເຕີ ເຮມ໋ອນ ໄດ້ລາຍງານຈຸດປະສົງຂອງການເຂົ້າພົບ ແລະ ຂໍ່ານັບ ທ່ານ ລັດຖະມົນຕີ ຄັ້ງນີ້ວ່າ: ເພື່ອສະເໜີຂໍ້ລິເລີ່ມພາກພື້ນທີ່ກ່ຽວຂ້ອງກັບການຮ່ວມມື ລະຫວ່າງ ກະຊວງພະລັງງານ ແລະ ບໍ່ແຮ່ ແລະ ສະຫະລັດອາເມລິກາ. ອັນທໍາອິດແມ່ນການຮ່ວມມືແມ່ນໍ້າຂອງ – ສະຫະລັດ (MUSP) ເປີດຕົວໃນປີ 2020 ເພື່ອເພີ່ມການຮ່ວມມືລະຫວ່າງ ບັນດາປະເທດແມ່ນໍ້າຂອງໃນບັນຫາຕ່າງໆເຊັ່ນ: ພະລັງງານ ໂດຍໄດ້ຮັບການສະໜັບສະໜູນຈາກສະຫະລັດອາເມລິກາ. (ວັນທີ 23-24 ກຸມພາທີ່ຜ່ານມາ, ສປປ ລາວ ໄດ້ເປັນເຈົ້າພາບຈັດກອງປະຊຸມສົນທະນາດ້ານນະໂຍບາຍ MUSP ກັບສະຫະລັດອາເມລິກາ, ການສົນທະນາດ້ານພະລັງງານສະອາດແລະການຄ້າພະລັງງານໃນພາກພື້ນ). ອັນທີ 2 ແມ່ນສັນຍາຄູ່ຮ່ວມມືພະລັງງານຍີ່ປຸ່ນ-ອາເມລິກາ-ແມ່ນ້ຳຂອງ (JUMPP), ຊຶ່ງລວມມີກົມຄຸ້ມຄອງພະລັງງານຂອງ ກະຊວງພະລັງງານ ແລະ ບໍ່ແຮ່ ໃນກຸ່ມທີ່ປຶກສາ. ໂຄງການທີ່ມີສ່ວນຮ່ວມກັບກະຊວງພະລັງງານ ແລະ ບໍ່ແຮ່ ພາຍໃຕ້ການລິເລີ່ມທັງສອງອັນນີ້ລວມມີ: ໂຄງການພະລັງງານອັດສະລິຍະຂອງ USAID ພາກພື້ນທີ່ໃຫ້ການຊ່ວຍເຫຼືອ ພາຍໃຕ້ໂຄງການ JUMPP. (ມີກອງປະຊຸມຝຶກອົບຮົມ ທີ່ນະຄອນຫຼວງວຽງຈັນ ກັບສູນພະລັງງານອາຊຽນ ກ່ຽວກັບພື້ນຖານໂຄງລ່າງດ້ານການເງິນກັບ EDL ແລະລະບົບໄຟຟ້າແມ່ນໍ້າຂອງອື່ນໆ); ໂຄງການສະໜັບສະໜຸນຄວາມພ້ອມຂອງພາຫະນະໄຟຟ້າ USAID, ຊ່ວຍເຫຼືອ MEM ເພື່ອຈັດຕັ້ງປະຕິບັດນະໂຍບາຍລົດຍົນ (EV).
ທ່ານ ທູດ ກ່າວຕື່ມວ່າ: ຍັງມີອີກຫຼາຍໂຄງການ ລະຫວ່າງ ສະຫະລັດອາເມລິກາ ແລະ ກະຊວງພະລັງງານ ແລະ ບໍ່ແຮ່, ລວມທັງການສະໜັບສະໜູນຈາກກອງທຶນວິສະວະກອນຂອງສະຫະລັດອາເມລິກາ ກ່ຽວກັບຄວາມປອດໄພຂອງເຂື່ອນ. ໂຄງການ USAID ມີທ່າແຮງທີ່ຈະໃຫ້ ກະຊວງພະລັງງານ ແລະ ບໍ່ແຮ່ ດ້ວຍການສະໜັບສະໜູນໂດຍກົງຈາກສະຫະລັດ. ໃນຂະນະທີ່ໂຄງການອື່ນໆໃຫ້ການຊ່ວຍເຫຼືອທາງດ້ານເຕັກນິກໄລຍະສັ້ນຫຼາຍກວ່ານັ້ນ, LES ແມ່ນຕັ້ງຢູ່ໃນນະຄອນຫຼວງວຽງຈັນ ມີຜູ້ຊ່ຽວຊານ ແລະ ຊັບພະຍາກອນພາຍໃນປະເທດເພື່ອສະໜອງການຊ່ວຍເຫຼືອອັນຫຼາກຫຼາຍໃຫ້ແກ່ ກະຊວງພະລັງງານ ແລະ ບໍ່ແຮ່ ແລະ ໄຟຟ້າລາວ ເຊິ່ງໄດ້ກໍານົດ 14 ຂົງເຂດຂອງການຊ່ວຍເຫຼືອ ແລະປະກອບມີທຶນຊ່ວຍເຫຼືອລ້າ 1 ລ້ານໂດລາສະຫະລັດ ສໍາລັບທຶນການສຶກສາຊັ້ນສູງໃນຂະແໜງພະລັງງານ, ເຊັ່ນດຽວກັນກັບທຶນຊ່ວຍເຫຼືອຂອງພາກເອກະຊົນລົງທຶນໃນເຕັກໂນໂລຊີພະລັງງານສະອາດ.
ພາບ ແລະ ຂ່າວ: ລຸ້ງຟ້າ ອົບພະຈັນ
ຮຽບຮຽງຂ່າວ: ຄຳແສງ ແກ້ວປະເສີດ
