ທ່ານ ລັດຖະມົນຕີ ຕ້ອນຮັບ ທ່ານ ເອກອັກຄະລັດຖະທູດ ອົດສະຕຣາລີ ເຂົ້າພົບປະ

         ໃນໂອກາດດັ່ງກ່າວນີ້, ທ່ານ ລັດຖະມົນຕີ ໄດ້ສະແດງຄວາມຕ້ອນຮັບ ທ່ານ ທູດ ພ້ອມຄະນະ ທີ່ໄດ້ມາຢ້ຽມຢາມ, ພົບປະ ແລະ ເຮັດວຽກກັບ ກະຊວງພະລັງງານ ແລະ ບໍ່ແຮ່ ຄັ້ງນີ້, ເພື່ອສືບຕໍ່ເສີມຂະຫຍາຍສາຍພົວພັນການຮ່ວມມື ລະຫວ່າງ ສອງປະເທດ ເວົ້າລວມ, ເວົ້າສະເພາະການຮ່ວມມື, ຊ່ວຍເຫຼືອໃນຂົງເຂດພະລັງງານ ແລະ ບໍ່ແຮ່ ທີ່ນັບມື້ນັບເພີ້ມຂຶ້ນເລື້ອຍໆ. ພ້ອມກັນນີ້, ທ່ານ ລັດຖະມົນຕີ ຍັງໄດ້ລາຍງານຫຍໍ້ ກ່ຽວກັບການພັດທະນາເສດຖະກິດ-ສັງຄົມ ຢູ່ ສປປລາວ ໃນປັດຈຸບັນ ເຊິ່ງຢູ່ໃນໄລຍະທີ່ສະພາບການເສດຖະກິດ ຂອງ ສປປລາວ ກໍ່ຄືຢູ່ໃນພາກພື້ນ ແລະ ໃນໂລກພວມປະເຊີນໜ້າກັບຄວາມຫຍຸ້ງຍາກ ແລະ ທ້າທາຍ ໂດຍສະເພາະ ການຈະເລີນເຕີບໂຕທາງດ້ານເສດຖະກິດມີທ່າອ່ຽງຫຼຸດລົງ, ອັດຕາໄພເງິນເຟີ້ຂະຫຍາຍຕົວສູງ. ເພື່ອແກ້ໄຂປະກົດການຫຍໍ້ທໍ້ດັ່ງກ່າວ ລັດຖະບານ ສປປລາວ ໄດ້ວາງຫຼາຍຄາດໝາຍສູ້ຊົນເພື່ອຊຸກຍູ້ໃຫ້ເສດຖະກິດຂອງປະເທດຟື້ນຕົວຂຶ້ນ ໜຶ່ງໃນນັ້ນກໍ່ແມ່ນວຽກງານພະລັງງານ ແລະ ບໍ່ແຮ່ ເຊິ່ງເປັນຂະແໜງການໜຶ່ງ ທີ່ມີທ່າແຮງໃນການຂັບເຄື່ອນໃຫ້ເສດຖະກິດຂອງປະເທດມີຄວາມໝັ້ນຄົງ ແລະ ຈະເລີນເຕີບໂຕຢ່າງໜັກແໜ້ນ. ທ່ານ ລັດຖະມົນຕີ ໃຫ້ຮູ້ຕື່ມວ່າ: ເພື່ອຕອບສະໜອງຄວາມຮຽກຮ້ອງຕ້ອງການດັ່ງກ່າວ ຂະແໜງການພະລັງງານ ແລະ ບໍ່ແຮ່ ຂອງພວກຂ້າພະເຈົ້າ ຈຶ່ງມີຄວາມຈຳເປັນຢ່າງຍິ່ງ ທີ່ຈະຕ້ອງມີພະນັກງານວິຊາການທີ່ເກັ່ງ ແລະ ມີຊ່ຽວຊານສະເພາະດ້ານ (ວິຊາການດ້ານພະລັງງານ ແລະ ດ້ານບໍ່ແຮ່). ສະນັ້ນ, ຖືໂອກາດດັ່ງກ່າວນີ້, ສະເໜີ ລັດຖະບານ ອົດສະຕາລີ ໂດຍຜ່ານ ທ່ານ ທູດ ເພື່ອຊ່ວຍເຫຼືອສະໜັບສະໜູນຍົກລະດັບຄວາມຮູ້, ຄວາມສາມາດໃນການພັດທະນາໂຄງການຕ່າງໆ ແລະ ຊ່ວຍເປັນທີ່ປຶກສາໃນບັນດາໂຄງການຕ່າງໆໃຫ້ແກ່ ສປປ ລາວ.