ສປປລາວ ແລະ ມາເລເຊຍ ເພີ່ມທະວີການພົວພັນຮ່ວມມືດ້ານພະລັງງານ ແລະ ບໍ່ແຮ່

          ຕອນເຊົ້າວັນທີ 9 ພຶດສະພາ 2023 ທີ່ຫ້ອງຮັບແຂກ ກະຊວງພະລັງງານ ແລະ ບໍ່ແຮ່ ທ່ານ ເອກອັກຄະລັດຖະທູດ ແຫ່ງ ມາເລເຊຍ ປະຈໍາ ສປປ ລາວ ທ່ານ Edi Irwan Bin Mahmud ໄດ້ເຂົ້າຢ້ຽມຢາມ, ພົບປະກັບ ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ເນື່ອງໃນໂອກາດທີ່ ທ່ານ ເຂົ້າຮັບໜ້າທີ່ໃໝ່ເປັນເອກອັກຄະລັດຖະທູດຜູ້ມີອຳນາດເຕັ້ມ ແຫ່ງ ມາເລເຊຍ ປະຈຳ ສປປ ລາວ.
          ໃນໂອກາດດັ່ງກ່າວ, ທ່ານ ທູດໄດ້ສະເໜີຈຸດປະສົງຂອງການມາພົບປະ ແລະ ຢ້ຽມຂໍ່ານັບ ທ່ານ ລັດຖະມົນຕີ ຄັ້ງນີ້, ກໍ່ເພື່ອທົບທວນຄືນ ການຈັດຕັ້ງປະຕິບັດວຽກງານການຮ່ວມມື ລະຫວ່າງ ລາວ ແລະ ມາເລເຊຍ ໃນຂະແໜງພະລັງງານ ແລະ ບໍ່ແຮ່ ໂດຍສະເພາະແມ່ນໂຄງການເຂື່ອນໄຟຟ້າ ດອນສະໂຮງ ທີ່ບໍລິສັດ Mega First Corporation Berhad Consortium ເຊິ່ງເປັນນັກລົງທຶນຈາກປະເທດມາເລເຊຍ ເປັນຜູ້ຖືຮຸ້ນ 80% ຮ່ວມກັບ ລັດວິສາຫະກິດໄຟຟ້າລາວ 20%, ອາຍຸສໍາປະທານ 25ປີ ໂຄງການມີກໍາລັງຕິດຕັ້ງ 260 ເມກາວັດ; ສາມາດຜະລິດພະລັງງານສະເລ່ຍ 2.000 ກິກກາວັດໂມງ/ປີ ຕັ້ງຢູ່ຫ້ວຍສະໂຮງ ລະຫວ່າງດອກສະດໍາ ແລະ ດອນສະໂຮງ ແຂວງ ຈໍາປາສັກ. ປັດຈຸບັນໂຄງການເຂື່ອນໄຟຟ້ານໍ້າຕົກດອນສະໂຮງ ໄດ້ຄົ້ນຄວ້າປຶກສາຫາລື ຄວາມເປັນໄປໄດ້ໃນການຂະຫຍາຍໂຄງການອອກໄປຕື່ມ ຈາກທີ່ມີປັດຈຸບັນ 4 ໜ່ວຍຈັກ ເປັນ 5 ໜ່ວຍ (ພາກຂະຫຍາຍຈັກເບີ5).