ໃນຕອນບ່າຍວັນທີ 10 ພຶດສະພາ 2023 ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ລົງຊຸກຍູ້, ຢ້ຽມຢາມ ແລະ ພົບປະຄະນະໜ່ວຍພັກ, ຄະນະກົມ ແລະ ພະນັກງານລັດຖະກອນພາຍໃນກົມຄຸ້ມຄອງຄວາມປອດໄພອຸດສາຫະກໍາພະລັງງານ ໂດຍໃຫ້ການຕ້ອນຮັບຢ່າງອົບອຸ່ນຈາກ ທ່ານ ບົວເທບ ມາໄລຄໍາ ຫົວໜ້າກົມຄຸ້ມຄອງຄວາມປອດໄພອຸດສາຫະກໍາພະລັງງານ ພ້ອມດ້ວຍຄະນະ ແລະ ພະນັກງງານພາຍໃນກົມ.
ໃນໂອກາດທີ່ມີຄວາມໝາຍສໍາຄັນນີ້ ທ່ານ ຫົວໜ້າກົມຄຸ້ມຄອງຄວາມປອດໄພອຸດສາຫະກໍາ ໄດ້ສະແດງຄວາມຕ້ອນຮັບ ແລະ ຂອບໃຈຢ່າງສູງຕໍ່ ທ່ານ ລັດຖະມົນຕີ ພ້ອມຄະນະ ທີ່ໄດ້ລົງມາພົບປະ, ຢ້ຽມຢາມ ແລະ ໂອ້ລົມ ພະນັກງານ, ລັດຖະກອນພາຍໃນກົມຄຸ້ມຄອງຄວາມປອດໄພອຸດສາຫະກໍາພະລັງງານ ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ໃກ້ຊິດຂອງການນໍາກະຊວງ.
ພາຍຫຼັງຮັບຟັງການລາຍງານສະພາບທີ່ພົ້ນເດັ່ນ ການຈັດຕັ້ງປະຕິບັດວຽກງານຂອງກົມໃນໄລຍະຜ່ານມາ, ທ່ານ ລັດຖະມົນຕີ ກໍ່ໄດ້ໂອ້ລົມ ແລະ ໃຫ້ທິດຊີ້ນຳຕໍ່ຄະນະໜ່ວຍພັກ, ຄະນະກົມ ແລະ ພະນັກງານພາຍໃນກົມໃນຫຼາຍດ້ານ ເປັນຕົ້ນແມ່ນດ້ານການເມືອງແນວຄິດ, ການຍົກສູງຄຸນນະພາບການຊີ້ນຳ-ນຳພາວຽກງານວິຊາສະເພາະ ໄປພ້ອມໆກັບການບຳລຸງ ແລະ ກໍ່ສ້າງພະນັກງານ, ເອົາໃຈໃສ່ຄຸ້ມຄອງ, ຕິດຕາມ ແລະ ກວດກາ ວຽກງານຄວາມປອດໄພໂຄງການພະລັງງານໄຟຟ້າຈາກເຂື່ອນ, ພະລັງງານຄວາມຮ້ອນ, ບັນດາອຸປະກອນ ກົນຈັກ-ໄຟຟ້າ ພາຍໃນໂຮງໄຟຟ້າ ແລະ ສົ່ງເສີມວຽກງານແຜນຮັບມືກໍລະນີສຸກເສີນ; ສຶກສາ, ຄົ້ນຄວ້າ, ສ້າງ, ປັບປຸງ, ແຜນຍຸດທະສາດ, ກົດໝາຍ, ລະບຽບການ, ມາດຕະຖານເຕັກນິກ, ສູນຄວາມປອດໄພເຂື່ອນ, ຄໍາແນະນໍາ ວ່າດ້ວຍ ຄວາມປອດໄພອຸດສາຫະກໍາພະລັງງານ; ເຜີຍແຜ່, ຝຶກອົບຮົມ, ການຝຶກຊ້ອມ, ໃຫ້ຄໍາປຶກສາ, ຄຳແນະນຳ ກ່ຽວກັບ ມາດຕະຖານເຕັກນິກ, ຄຳແນະນຳ ວ່າດ້ວຍ ຄວາມປອດໄພຂອງເຂື່ອນ, ແຜນຮັບມືສຸກເສີນ ໃຫ້ຂັ້ນສູນກາງ ແລະ ທ້ອງຖິ່ນ; ຄຸ້ມຄອງ, ຕິດຕາມ, ກວດສອບ-ກວດກາ ການສຳຫລວດ, ອອກແບບ, ກໍ່ສ້າງ, ດໍາເນີນງານ, ຜູ້ພັດທະນາໂຄງການ, ບໍລິສັດທີ່ປຶກສາ, ໃນການຈັດຕັ້ງປະຕິບັດກົດໝາຍ, ລະບຽບການ, ມາດຕະຖານເຕັກນິກ ແລະ ບັນດາຄໍາແນະນຳ ວ່າດ້ວຍ ຄວາມປອດໄພຂອງເຂື່ອນ; ແຕ່ງຕັ້ງ ຫົວໜ້າວິສະວະກອນ ທີ່ຮັບຜິດຊອບ ສຳລັບການອອກແບບ, ການກໍ່ສ້າງ ແລະ ການດຳເນີນງານ; ຂຶ້ນທະບຽນ ປະເພດຄວາມສ່ຽງຂອງເຂື່ອນ ແລະ ອອກໜັງສືຮັບຮູ້ ຄວາມປອດໄພຂອງເຂື່ອນ; ເຮັດວຽກໂດຍກົງນໍາທີ່ປຶກສາເອກະລາດ, ຊ່ຽວຊານພາຍໃນ ແລະ ສາກົນ; ກວດສອບ ແລະ ກວດກາ ຄຸນນະພາບ ແລະ ມາດຕະຖານ ບັນດາອຸປະກອນ, ວັດສະດຸ ທີ່ຮັບໃຊ້ ການກໍ່ສ້າງ, ບໍາລຸງຮັກສາ ແລະ ກ່ອນມອບໂອນ ໂຄງການໃຫ້ລັດຖະບານ ຂອງໂຄງການອຸດ ສາຫະກຳພະລັງງານ; ປະສານສົມທົບ ແລະ ຮ່ວມມືກັບຂະແໜງການກ່ຽວຂ້ອງ ດ້ານຄວາມປອດໄພອຸດສາຫະກຳພະລັງ ງານ ແລະ ແຜນຮັບມືສຸກເສີນ ແລະ ອື່ນໆ.
ພາບ ແລະ ຂ່າວ: ລຸ້ງຟ້າ ອົບພະຈັນ
ຮຽບຮຽງ ແລະ ກວດແກ້: ຄຳແສງ ແກ້ວປະເສີດ
