ເພື່ອສືບຕໍ່ເສີມຂະຫຍາຍການຮ່ວມມືກັນລະຫວ່າງ ກະຊວງພະລັງງານ ແລະ ບໍ່ແຮ່ ກັບບໍລິສັດ Best Telecom ໂດຍສະເພາະ ການຮ່ວມມືກັນໃນການສະໜອງ-ການນຳໃຊ້ ການບໍລິການລະບົບອິນເຕີເນັດ (Internet ) ທາງລັດຖະການ ໃຫ້ມີຄວາມວ່ອງໄວ, ໝັ້ນຄົງ ແລະ ມີປະສິດທິພາບຂຶ້ນກວ່າເກົ່າ. ທ່ານ ນາງ ສົມຈິດ ເລືອງວັນໄຊ, ຮອງຜູ້ອຳນວຍການບໍລິສັດ Best Telecom ໄດ້ເຂົ້າພົບ ແລະ ເຮັດວຽກກັບຫ້ອງການກະຊວງ ໂດຍໃຫ້ການຕ້ອນຮັບຂອງ ທ່ານ ສຸລິຍາ ແສງດາລາວົງ ຮອງຫົວໜ້າຫ້ອງການກະຊວງ, ຜູ້ຊີ້ນຳວຽກງານປະຊາສຳພັນ ແລະ ໄອທີ. ໃນໂອກາດດັ່ງກ່າວ ທ່ານ ຮອງຫົວໜ້າຫ້ອງການກະຊວງ ໄດ້ສະແດງຄວາມຕ້ອນຮັບຕໍ່ ທ່ານ ຮອງຜູ້ອຳນວຍການບໍລິສັດ ພ້ອມຄະນະທີ່ໄດ້ມາຢ້ຽມຢາມກະຊວງພະລັງງານ ແລະ ບໍ່ແຮ່. ພ້ອມກັນນີ້, ທ່ານ ຮອງຫົວໜ້າຫ້ອງການກະຊວງ ກໍ່ໄດ້ລາຍງານຫຍໍ້ກ່ຽວກັບການຈັດຕັ້ງປະຕິບັດແຜນຍຸດທະສາດຂອງ ລັດຖະບານ ໃນການສ້າງລັດຖະບານດີຈີຕ໋ອນ ຢູ່ກະຊວງພະລັງງານ ແລະ ບໍ່ແຮ່ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ທ່ານ ຮອງຫົວໜ້າຫ້ອງການກະຊວງ ສະແດງຄວາມຊົມເຊີຍຕໍ່ບໍລິສັດ ທີ່ໄດ້ສະໜອງການບໍລິການດ້ານອິນເຕີເນັດໃຫ້ກະຊວງພະລັງງານ ແລະ ບໍ່ແຮ່ ເຊິ່ງເປັນສ່ວນໜຶ່ງໃນການຈັດຕັ້ງປະຕິບັດຍຸດທະສາດດັ່ງກ່າວ.
