ທ່ານລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະໄດ້ລົງຕິດຕາມ, ກວດກາ ແລະ ຊຸກຍູ້ເຄື່ອນໄຫວວຽກງານທີ່ແຂວງ ຫຼວງພະບາງ

ທ່ານລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະໄດ້ລົງຕິດຕາມ, ກວດກາ ແລະ ຊຸກຍູ້ເຄື່ອນໄຫວວຽກງານທີ່ແຂວງ ຫຼວງພະບາງ

          ໃນຕອນເຊົ້າ ວັນທີ 29 ພຶດສະພາ 2023 ທີ່ຫ້ອງວ່າການ ແຂວງ ນະຄອນຫຼວງພະບາງ ທ່ານ ໂພໄຊ ໄຊຍະສອນ ກຳມະການສູນກາງພັກ , ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ແລະ ພົບປະໂອລົມກັບການນຳຫຼັກແຫຼ່ງ ແຂວງ ຫຼວງພະບາງ ໂດຍໃຫ້ການຕອນຮັບຂອງ ທ່ານ ຄຳຂັນ ຈັນທະວີສຸກ ກຳມະການສູນກາງພັກ, ເຈົ້າແຂວງ ແຂວງ ຫຼວງພະບາງ ພ້ອມດ້ວຍພະນັກງານການນຳຂອງແຂວງເຂົ້າຮ່ວມ.

          ໃນໂອກາດນີ້, ທ່ານ ເຈົ້່າແຂວງ ຫຼວງພະບາງ ໄດ້ກ່າວສະແດງຄວາມຂໍ່ານັບຊົມເຊີຍ ແລະ ຍິນດີຕອນຮັບ ທ່ານ ລັດຖະມົນຕີ ກະຊວງ ພະລັງານ ແລະ ບໍ່ແຮ່ ພ້ອມດ້ວຍຄະນະທີ່ມາເຄື່ອນໄຫວໃນແຂວງ ຫຼວງພະບາງ ພ້ອມທັງລາຍງານລາຍສະພາບການຈັດຕັ້ງປະຕີບັດ ແຜນເສດຖະກິດ ແລະ ສັງຄົມ ທີ່ຕິດພັນກັບວຽກງານ ຂະແໜງ ພະລັງງານ ແລະ ບໍ່ແຮ່ ທີ່ລັດວິສາຫະກິດ ໄຟຟ້າລາວ ສາຂາ ຫຼວງພະບາງດັ່ງນີ້ ດັ່ງນີ້:

• ດ້ານພະລັງງານ
1. ການພັດທະນາແຫຼ່ງຜະລິດ : ໄດ້ເອົາໃຈໃສ່ໃນລົງຕິດຕາມກວດກາ, ຊຸກຍູ້ ແລະ ອໍານວຍຄວາມສະດວກໃຫ້ແກ່ການກະກຽມເຮັດວຽກລ່ວງໜ້າຂອງໂຄງການກໍ່ສ້າງເຂື່ອນນໍ້າຂອງຫຼວງພະບາງ ພ້ອມທັງກໍ່ສ້າງບ້ານ ຈັດສັນໃໝ່ (ບ້ານ ຫ້ວຍຢໍ້) ແລະ ຍົກຍາຍປະຊາຊົນສໍາເລັດແລ້ວ 100%, ປະຈຸບັນແມ່ນພວມດໍາເນີນກໍ່ສ້າງຮາກຖານເຂື່ອນຄື: ເຮືອນຈັກໄຟຟ້າສໍາເລັດ 82,10%, ປະຕູລະບາຍນຳ້ລົ້ນ 18,84%, ຊ່ອງທາງເດີນເຮືອ 17,01%, ຄັນຄູກັ້ນນຳ້ 36,14 %, ງານຂຸດດິນເບື້ອງຂວາ 69,35% ແລະ ທາງປາຜ່ານ 24,70%.
2. ການຜະລິດ-ຈໍາໜ່າຍກະແສໄຟຟ້າ : ແຂວງ ຫຼວງພະບາງ ມີແຫຼ່ງຜະລິດພະລັງງານໄຟຟ້ານໍ້າຕົກ 06 ແຫ່ງ (ນໍ້າມອງ, ນໍ້າອູ 1, 2, 3, ແລະ ນໍ້າຄານ 2, 3) ມີກໍາລັງຕິດຕັ້ງ 700,07 ເມກາວັດ (MW). ໃນໄລຍະ 06 ເດືອນຕົ້ນປີ ສາມາດຜະລິດກະແສໄຟຟ້າໄດ້ 860,83 ລ້ານກິໂລວັດໂມງ (kWh) ທຽບໃສ່ແຜນການປະຕິບັດໄດ້ 89%, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 2,64%. ແລະ ໄດ້ສະໜອງກະແສໄຟຟ້າໃຫ້ແກ່ລູກຄ້າລາຍໃຫຍ່ເຊັ່ນ: ໂຮງງານຊີມັງຫຼວງພະບາງ, ຊີມັງ CONCH, ບໍ່ຄໍາຜາປົ່ນ, ສູນ Warp data, ບໍລິສັດ ຊໍການຊ່າງ ແລະ ບໍລິສັດ SMG ໄດ້ຈໍານວນ 1.134,41 ລ້ານກິໂລວັດໂມງ (kWh), ປະຕິບັດໄດ້ 82% ຂອງແຜນການ, ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 7,46%. (ສໍາລັບການສະໜອງກະແສໄຟຟ້າໃຫ້ແກ່ລູກຄ້າລາຍໃຫຍ່ຕົວເລກສູງກວ່າການຜະລິດຢູ່ບັນດາເຂື່ອນພາຍໃນແຂວງ ແມ່ນເນື່ອງຈາກວ່າໄດ້ຊື້ກະແສໄຟຟ້າມາຈາກບັນດາສະຖານີຕ່າງແຂວງຄື: ສະຖານີ ແຂວງ ອຸດົມໄຊ, ແຂວງ ວຽງຈັນ ແລະ ແຂວງ ໄຊຍະບູລີ). ນອກຈາກນີ້ ພາກຈໍາໜ່າຍທົ່ວໄປ ໄດ້ມີການຊື້ກະແສໄຟຟ້າ ຈໍານວນ 124,88 ລ້ານກິໂລວັດໂມງ (kWh), ປະຕິບັດໄດ້ລື່ນແຜນການ 8,13%, ສົມທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 16%, ແລະ ຈໍາໜ່າຍກະແສໄຟຟ້າໄດ້ 112,96 ລ້ານກິໂລວັດໂມງ (kWh), ປະຕິບັດໄດ້ລື່ນແຜນການ 7,23%, ສົມທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 14%. ໃນນີ້ມີພະລັງງານຕົກເຮ່ຍຈໍານວນ 9,1 ລ້ານກິໂລວັດໂມງ (kWh), ຄິດເປັນ 6,25%.
3. ການຂະຫຍາຍລະບົບສົ່ງ ແລະ ສະຖານີ : ແຂວງ ຫຼວງພະບາງ ມີສະຖານີໄຟຟ້າ ຈໍານວນ 05 ແຫ່ງ (ສະຖານີຂົວທີ່1, ແສນສຸກ, ປາກມອງ 1, 2 ແລະ ສະຖານີຊຽງເງິນ) ມີກໍາລັງຕິດຕັ້ງ 652,5 ເມກາໂວນອໍາແປ (MVA), ມີຄວາມຍາວຕາຂ່າຍໄຟຟ້າແຮງສູງ 850,92 ກິໂລແມັດ, ແຮງກາງ 2.465,50 ກິໂລແມັດ, ແຮງຕໍ່າ 806,76 ກິໂລແມັດ, ໝໍ້ແປງຈໍານວນ 2.057 ໜ່ວຍ ແລະ ໝໍ້ນັບໄຟຈໍານວນ 93.271 ໜ່ວຍ.
4. ການຊົມໃຊ້ໄຟຟ້າຢູ່ພາຍໃນແຂວງ : ໃນໄລຍະຜ່ານມາ ທາງພະແນກພະລັງງານ ແລະ ບໍ່ແຮ່ ໄດ້ສູ້ຊົນຂະຫຍາຍໄຟຟ້າອອກສູ່ຊົນນະບົດ, ໄດ້ຊົມໃຊ້ໄຟຟ້າທຸກລະບົບ ຈໍານວນ 710 ບ້ານ (ເພີ່ມຂຶ້ນ 08 ບ້ານ), ມີ 78,933 ຄອບຄົວ (ເພີ່ມຂຶ້ນ 2.868 ຄອບຄົວ) ກວມເອົາ 92,14% ຂອງຄອບຄົວທັງໝົດ, ໃນນີ້ໄດ້ຊົມໃຊ້ໄຟຟ້າແຫ່ງຊາດຈໍານວນ 618 ບ້ານ, 76.012 ຄອບຄົວ ກວມເອົາ 88,73%. ທຽບໃສ່ມະຕິ VIII ຂອງອົງຄະນະພັກແຂວງກໍານົດໄວ້ແມ່ນ 98% ເຫັນວ່າຍັງບໍ່ທັນບັນລຸຄາດໝາຍ 5,86% ເນື່ອງຈາກວ່າ ບາງໂຄງການກໍ່ສ້າງລະບົບຕາຂ່າຍໄຟຟ້າອອກສູ່ຊົນນະບົດ ແມ່ນປະຕິບັດບໍ່ສໍາເລັດຕາມແຜນການ ສາເຫດຍ້ອນການລະບາດຂອງເຊື້ອພະຍາດໂຄວິດ ແລະ ພົບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ການຊໍລະງົບປະມານບໍ່ໄດ້ຕາມແຜນການ, ແຕ່ເຖິງຢ່າງໃດກໍ່ຕາມທາງພະແນກຂອງພວກເຮົາກໍ່ໄດ້ສູ້ຊົນຍາດແຍ່ງທຶນເອົາທຶນຮອນຈາກກະຊວງ ແລະ ນໍາໃຊ້ງົບປະມານກອງທຶນພັດທະນາທ້ອງຖິ່ນ-ສັງຄົມ ຂອງໂຄງການພັດທະນາດ້ານທໍລະນີສາດ-ບໍ່ແຮ່ ມາຈັດຕັ້ງປະຕິບັດໂຄງການໄດ້ຈໍານວນໜຶ່ງ.
• ດ້ານທໍລະນີສາດ ແລະ ແຮ່ທາດ
ປະຈຸບັນມີບັນດາໂຄງການທີ່ໄດ້ຮັບອະນຸຍາດຈາກລັດຖະບານ ໃນການດໍາເນີນກິດຈະການດ້ານແຮ່ທາດ ຈໍານວນ 13 ບໍລິສັດ, 16 ກິດຈະການ, ມີເນື້ອທີ່ສໍາປະທານທັງໝົດ 1.347,77 ກມ2 ຄື: ຊອກຄົ້ນແຮ່ທາດ 03 ກິດຈະການ; ສໍາຫຼວດແຮ່ທາດ 07 ກິດຈະການ; ຂຽນບົດວິພາກເສດຖະກິດ-ເຕັກນິກ 03 ກິດຈະການ; ຂຸດຄົ້ນ-ປຸງແຕ່ງແຮ່ທາດ 03 ກິດຈະການ.
– ຂຸດຄົ້ນແຮ່ຄໍາໄດ້ 101.609 ໂຕນ, ທຽບໃສ່ແຜນການປະຕິບັດໄດ້ 99,39%; ປຸງແຕ່ງແຮ່ຄໍາໄດ້ 106.331,06 ໂຕນ, ທຽບໃສ່ແຜນການເຫັນວ່າປະຕິບັດໄດ້ລື່ນແຜນການ 4% ເນື່ອງຈາກວ່າໄດ້ເອົາແຮ່ທີ່ຄ້າງສະໜາມມາປຸງແຕ່ງເພີ່ມ; ໃນນີ້ມີແຮ່ຄໍາສະເລ່ຍ 3 ກຼາມ/ໂຕນ ແລະ ຫຼອມໂລຫະຄໍາໄດ້ 28 ແທ່ງ, ນໍ້າໜັກ 273.500 ກຼາມ;
– ຜະລິດແຮ່ອະໂລຫະໄດ້ຈໍານວນ 366.061 ແມັດກ້ອນ, ປະຕິບັດໄດ້ 78,55% ຂອງແຜນການ, ແລະ ຈໍາໜ່າຍໄດ້ 207.645 ແມັດກ້ອນ, ປະຕິບັດໄດ້ 30,41% ຂອງແຜນການ, ສາເຫດທີ່ການຜະລິດ ແລະ ການຈໍາໜ່າຍ ບໍ່ໄດ້ຕາມແຜນການ ເນື່ອງຈາກວ່າມີບາງບໍລິສັດໄດ້ສະເໜີຂໍຢຸດກິດຈະການຊົ່ວຄາວ ແລະ ບໍ່ໄດ້ດໍາເນີນການຂຸດຄົ້ນ.

           ສິ່ງທີ່ພົ້ນເດັ່ນ ແມ່ນໄດ້ເອົາໃຈໃສ່ໃນການຕິດຕາມກວດກາ ແລະ ຊຸກຍູ້ບັນດາໂຄງການຂຸດຄົ້ນແຮ່ທາດ (ແບບທົດລອງ) ຕາມນະໂຍບາຍໃໝ່ຂອງລັດຖະບານ, ເຊິ່ງມີທັງໝົດ 11 ບໍລິສັດ, ມີເນື້ອທີ 428,35 ເຮັກຕາ. ໃນນີ້ຂຸດຄົ້ນແຮ່ເຫຼັກ ມີ 01 ບໍລິສັດ ໄດ້ຈໍານວນ 2.000 ກວ່າໂຕນ (ບໍ່ທັນໄດ້ສົ່ງອອກເທື່ອ); ຂຸດຄົ້ນຫີນມາໂບ້ 01 ບໍລິສັດ (ຍັງບໍ່ທັນໄດ້ຂຸດຄົ້ນເທື່ອ) ແລະ ຂຸດຄົ້ນຄໍາຕົກຂ້ອນ 09 ບໍລິສັດ ໄດ້ຈໍານວນ 5.884,80 ກຼາມ. ນອກຈາກນີ້, ໄດ້ເອົາໃຈໃສ່ໃນການຕິດຕາມກວດກາ ການສົ່ງອອກແຮ່ເຫຼັກ ເພື່ອໄປຈໍາ ໜ່າຍຢູ່ຕ່າງປະເທດ (ສປ ຈີນ) ຂອງບັນດາບໍລິສັດຕ່າງໆ, ໂດຍຜ່ານສະຖານີລົດໄຟຫຼວງພະບາງ ໄດ້ຈໍານວນທັງໝົດ 344.793,90 ໂຕນ, ໃນນີ້ມີແຮ່ເຫຼັກ 341.787,09 ໂຕນ ແລະ ແຮ່ຫາຍາກ 3.006,81 ໂຕນ.

           ຜ່ານການຮັບຟັງ ທ່ານ ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ກໍ່ສະແດງຄວາມຊົມເຊີຍມາການນຳແຂວງ ທີເອົາໃຈໃສ່ວຽກງານ ຂະແໜງການ ພະລັງງານ ແລະ ບໍ່ແຮ່ ທີ່ໄດ້ຈັດຕັ້ງປະຕີບັດໃນໄລຍະຜ່ານມາໄດ້ເປັນຢ່າງດີ ແລະ ລະອຽດ ພ້ອມນີ້ໄດ້ຊີ້ນໍາໃຫ້ສືບຕໍ່ປະສານສົມທົບ ນໍາຂະແໜງການທີ່່ກ່ຽວຂ້ອງ ກໍຄືອໍານາດການປົກຄອງທ້ອງຖິ່ນໃນການຊ່ວຍເຫຼືອການເປັນຢູ່ຂອງປະຊາຊົນໃຫ້ປະສົບຜົນສໍາເລັດຕາມແຜນການທີ່ວາງໄວ້.

            ສ່ວນບັນຫາອື່ນໆທີ່ຕິດພັນກັບການພັດທະນາໂຄງການພະລັງງງານ ແລະ ບໍ່ແຮ່ ພາຍໃນແຂວງ ຫຼວງພະບາງ ນັ້ນ, ທ່ານລັດຖະມົນຕີ ກະຊວງພະລັງງານ ແລະບໍ່ແຮ່ ໄດ້ຊີ້ນໍາໃຫ້ບໍລິສັດສືບຕໍ່ປັບປຸງແກ້ໄຂ ໂດຍປະສານສົມທົບຢ່າງກົມກຽວກັບຂະແໜງການກ່ຽວ ຂ້ອງຂອງສູນກາງ ແລະທ້ອງຖິ່ນ ເພື່ອເຮັດໃຫ້ໂຄງການ ພະລັງງານ ແລະ ບໍ່ແຮ່ ສາມາດຈັດຕັ້ງປະຕິບັດດ້ວຍຄວາມໂລ່ງລ່ຽນ ແລະ ປະສົບຜົນສຳເລັດ. ນອກຈາກນີ້ຍັງໄດ້ໃຫ້ທິດຊີ້ນຳ ແລະເນັ້ນໜັກໃຫ້ ໂຄງການ ໃຫ້ເອົາໃຈໃສ່ໃນການປະຕິບັດມາດຕະຖານເຕັກນິກຂອງໂຄງການໃຫ້ມີຄວາມເປັນເອກະພາບ ເພື່ອຮັບປະກັນດ້ານຄຸນນະພາບຂອງໂຄງການ ແລະ ປະສິດທິຜົນຂອງໂຄງການໃນໄລຍາວ, ທັງເປັນການປະກອບສ່ວນອັນສຳຄັນໃນການພັດທະນາເສດຖະກິດ-ສັງຄົມຂອງຊາດ.

ພາຍຫຼັງ ພົບປະກັບການນຳ ແຂວງ ຫຼວງພະບາງ ແລ້ວ ທ່ານ ລັດຖະມົນຕີກະຊວງ ພະລັງງານ ແລະ ບໍ່ແຮ່ ພ້ອມຄະນະ ກໍ່ໄດ້ລົງ ຢ້ຽມຢາມ ສູນການບັນສາການເຂື່ອນ ນ້ຳອູ 1-7 ນອກນີ້ຍັງໄດ້ລົງເບີ່ງສະພາບການຈັດຕັ້ງປະຕີບັດຂອງເຂື່ອນນ້ຳອູ 1 ແລະ ລົງເບີ່ງບ້ານຈັດສັນຂອງໂຄງການ ນ້ຳອູ 1 ທີ່ບ້ານ ຫ້ວຍໂລ້.
ນອກນີ້ຄະນະນຳກະຊວງຍັງໄດ້ເອົາໃຈໃສວຽກງານຕ່າງໆເພື່ອໃຫ້ວຽກງານ ພະລັງງານ ແລະ ບໍ່ແຮ່ ໃນທ້ອງຖິ່ນ ມີຄວາມສະດວກໄປມາສະດວກພ້ອມຮັບໃຊ້ຕະຫຼອດເວລາ ໃນນີ້ໄດ້ຮັບຄວາມອຸປະທຳຈາກບໍລິສັດ ຫຼວງພະບາງ ພາວເວີ ຈຳກັດ ເຊີ່ງມອບໃຫ້ ຫ້ອງການເມືອງ ພະແນກ ພະລັງງານ ເມືອງ ປາກອູ ແລະ ເມືອງ ຈອມເພັດ ເພື່ອຮັບໃຊ້ໃນວຽກງງານ ພະລັງງານ ແລະ ບໍ່ແຮ່.
ພາບ ແລະ ຂ່າວ: ປະສົງໄຊ ໂຄດໂຍທາ