ເພື່ອກະກຽມໃຫ້ແກ່ການດຳເນີນກອງປະຊຸມກາງສະໄໝ ໃນທົ່ວອົງຄະນະພັກກະຊວງ ເວົ້າລວມ, ເວົ້າສະເພາະ ຂອງສອງໜ່ວຍພັກຮາກຖານ ໃຫ້ດຳເນີນຖືກຕ້ອງຕາມຫລັກການ ທັງຮັບປະກັນໃຫ້ສະມາຊິກພັກໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ. ຕອນເຊົ້າວັນທີ 21 ມິຖຸນາ 2023 ນີ້ຢູ່ຫ້ອງປະຊຸມໃຫຍ່ຊັ້ນ 5 ໄດ້ຈັດກອງປະຊຸມດັ່ງກ່າວຂຶ້ນ ພາຍໃຕ້ການເປັນປະທານຮ່ວມຂອງ ສະຫາຍ ຄຳໂສ້ ກຸໂພຄຳ ກຳມະການຄະນະບໍລິຫານງານພັກກະຊວງ, ເລຂາໜ່ວຍພັກຫ້ອງການກະຊວງ ແລະ ສະຫາຍ ສົມພິດ ແກ້ວວິຈິດ ກຳມະການຄະນະບໍລິຫານງານພັກກະຊວງ, ເລຂາໜ່ວຍພັກກົມທຸລະກິດພະລັງງານ. ມີບັນດາ ສະຫາຍ ຮອງເລຂາໜ່ວຍພັກ, ຄະນະໜ່ວຍພັກ, ສະມາຊິກພັກສົມບູນ ແລະ ສຳຮອງຂອງທັງສອງໜ່ວຍພັກ ເຂົ້າຮ່ວມຢ່າງພ້ອມພຽງ.
ເອກະສານທີ່ນຳມາເຜີຍແຜ່ຄັ້ງນີ້ລວມມີ:
ຄຳສັ່ງຂອງຄະນະເລຂາທິການສູນກາງພັກ, ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມກາງສະໄໝຂອງຄະນະບໍລິຫານງານພັກແຕ່ລະຂັ້ນ;
ຄຳແນະນຳຂອງຄະນະຈັດຕັ້ງສູນກາງພັກ, ສະບັບເລກທີ 25/ຄຈສພ, ລົງວັນທີ 24 ມັງກອນ 2023 ວ່າດ້ວຍການດຳເນີນກອງປະຊຸມກາງສະໄໝຂອງຄະນະບໍລິຫານງານພັກແຕ່ລະຂັ້ນ;
ຄຳແນະນຳຂອງຄະນະກວດກາສູນກາງພັກ, ສະບັບເລກທີ 74/ຄກສພ, ລົງວັນທີ 27 ມີນາ 2023 ວ່າດ້ວຍການດຳເນີນຊີວິດການເມືອງກາງສະໄໝຂອງຄະນະບໍລິຫານງານພັກແຕ່ລະຂັ້ນ ແລະ ມະຕິຂອງກົມການເມືອງສູນກາວພັກ, ສະບັບເລກທີ 030/ກມສພ, ລົງວັນທີ 30 ມັງກອນ 2018 ໂດຍໃຫ້ກຽດເຜີຍແຜ່ຂອງ ສະຫາຍ ເລຂາໜ່ວຍພັກຫ້ອງການກະຊວງ ແລະ ເລຂາໜ່ວຍພັກກົມທຸລະກິດພະລັງງານ.
ນອກຈາກນີ້, ຜູ້ແທນກອງປະຊຸມຍັງໄດ້ຮັບຟັງການແນະນຳກ່ຽວກັບການຈັດຕັ້ງປະຕິບັດຂອງ 4 ເອກະສານຂ້າງເທິງຈາກຫ້ອງການຄະນະພັກກະຊວງຕື່ມອີກ.
ພາບ: ວິລະຊາດ ສາຍອັດຕະປື
ຂ່າວ: ຄຳແສງ ແກ້ວປະເສີດ
