ກອງປະຊຸມທາບທາມຄໍາຄິດເຫັນຕໍ່ການປັບປຸງກົດໝາຍ ວ່າດ້ວຍແຮ່ທາດ ສະບັບເລກທີ 31/ສພຊ, ລົງວັນທີ 3 ພະຈິກ 2017. ໃນລະຫວ່າງວັນທີ 21-22 ມິຖຸນາ 2023 ທີ່ໂຮງແຮມ ດອກຈໍາປາ ເມືອງ ປາກຊັນ, ແຂວງ ບໍລິຄໍາໄຊ. ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ ໂດຍພາຍໃຕ້ການເປັນປະທານຂອງທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່. ມີຫົວໜ້າກົມ, ຮອງກົມ ແລະ ຜູ້ຕາງໜ້າຈາກຂະແໜງການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ກົດໝາຍວ່າດ້ວຍບໍ່ ແຮ່ ສະບັບ ເລກທີ 04/97/ສພຊ, ລົງວັນທີ 12 ເມສາ 1997, ປະກອບມີ 8 ໝວດ ແລະ 63 ມາດຕາ.
ຫຼັງຈາກນັ້ນມາໄດ້ມີການປັບປຸງທັງໝົດ 3 ຄັ້ງຄື:
– ປີ2008 ແມ່ນ ໄດ້ປ່ຽນຊື່ເປັນກົດໝາຍວ່າດ້ວຍແຮ່ທາດ ສະບັບ ເລກທີ 04/ສພຊ, ລົງວັນທີ 8 ທັນວາ 2008, ປະກອບມີ12 ພາກ, 12 ໝວດ ແລະ 102 ມາດຕາ.
– ປີ 2011 ແມ່ນ ສະບັບ ເລກທີ 02/ສພຊ, ລົງວັນທີ 20 ທັນວາ 2011, ປະກອບມີ 12 ພາກ, 12 ໝວດ ແລະ 102 ມາດຕາ.
– ປີ 2017 ແມ່ນສະບັບທີ່ນໍາໃຊ້ປະຈຸບັນ ສະບັບ ເລກທີ 31/ສພຊ, ລົງວັນທີ 03 ພະຈິກ 2017, ປະກອບມີ15 ພາກ, 15 ໝວດ ແລະ 136 ມາດຕາ.
ກົດໝາຍວ່າດ້ວຍແຮ່ທາດ ສະບັບປັບປຸງ ປີ 2017 ໄດ້ຮັບການຈັດຕັ້ງປະຕິບັດຢ່າງເປັນເອກະພາບ ໃນຂອບ ເຂດທົ່ວປະເທດ ເຊິ່ງໄດ້ກໍານົດຫຼັກການ, ລະບຽບການ, ມາດຕະການ ແລະ ເປັນເຄຶ່ອງມືໃນການຄຸ້ມຄອງ, ຕິດຕາມ ກວດກໍາການດໍາເນີນກິດຈະການກ່ຽວກບັແຮ່ທາດ ໃຫ້ເປັນລະບົບ, ມີປະສິດທິຜົນສູງ ແລະ ມີຄວາມໂປ່ງໃສ. ຮັບປະກັນການປ້ອງກັນສຸຂະພາບ, ຊີວິດ, ຄວາມປອດໄພຂອງຜູ້ອອກແຮງງານ, ຊຸມຊົນທີ່ໄດ້ຮັບຜົນກະທົບ ແລະ ການປົກປັກຮັກສາສິ່ງແວດລ້ອມ-ສັງຄົມ ໄປຕາມທິດສີຂຽວ ແລະ ຍືນຍົງ.
ຈາກຜົນຂອງການຄົ້ນຄວ້າ, ທົບທວນ ແລະ ປະເມີນການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ສະບັບ ດັ່ງກ່າວ ເຫັນໄດ້ວ່າ: ມີບາງມາດຕາຂອງກົດໝາຍຍັງບໍ່ທັນແທດເໝາະກັບສະພາບຄວາມເປັນຈິງ ແລະ ນະໂຍບາຍ ຂອງລັດຖະບານໃນປະຈຸບັນ ເປັນຕົ້ນການຫຼຸດຜ່ອນຂັ້ນຕອນຂອງການອອກອະນຸຍາດ, ການຄັດຈ້ອນເນື້ອທີ່ການ ອອກອະນຸຍາດ, ການເພີ່ມສິດ ແລະ ພາລະບົດບາດໃຫ້ແກ່ທ້ອງຖິ່ນໃນການຄຸ້ມຄອງກິດຈະການກ່ຽວກບໍ່ແຮ່ທາດ.
ເພື່ອຕອບສະໜອງເຫດຜົນຂ້າງເທິງນັ້ນ ແລະ ກໍ່ເພື່ອເຮັດໃຫ້ກົດໝາຍສະບັບນີ້ມີຄວາມຊັດເຈນກວ່າເກົ່າ, ຍົກສູງບົດບາດການຄຸ້ມຄອງຂອງພາກລັດຮັບປະກັນການດໍາເນີນກິດຈະການກ່ຽວກັບແຮ່ທາດ ສອດຄ່ອງກັບແຜນ ພັດທະນາເສດຖະກິດ-ສັງຄົມ ແລະ ທັງເປັນການສ້າງຄວາມເຊື່ອໝັ້ນໃຫ້ນັກລົງທຶນທັງພາຍໃນ ແລະ ຕ່າງປະເທດຈື່ງເຫັນວ່າມີຄວາມຈໍາເປັນຕ້ອງໄດ້ຄົ້ນຄວ້າ ທົບທວນ ແລະ ປັບປຸງບາງມາດຕາຂອກົດໝາຍວ່າດ້ວຍແຮ່ທາດຄືນໃໝ່.
ດ້ວຍເຫດນັ້ນກະຊວງພະລັງງານ ແລະ ບໍ່ແຮ່ ໄດ້ປະຕິບັດຕາມແຈ້ງການຂອງຫ້ອງວ່າການສໍານັກງານນາຍົກ ລັດຖະມົນຕີສະບັບ ເລກທີ 334/ຫສນຍ, ລົງວັນທີ 8 ເມສາ 2023 ໂດຍໄດ້ດໍາເນີນການຄົ້ນຄວ້າ, ທົບທວນຄືນການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ແລະ ໄດ້ສະເໜີປັບປຸງບາງມາດຕາ ຂອງກົດໝາຍ ເພື່ອແກ້ໄຂວາລະແຫ່ງຊາດ; ເຊິ່ງອີງໃສ່ ໄລຍະເວລາທີ່ຈໍາກັດ ໃນໄລຍະນັ້ນກະຊວງພະລັງງານ ແລະ ບໍ່ແຮ່ ໄດ້ສະເໜີລັດຖະບານ/ ສະພາ ເພື່ອພິຈາລະນາປັບປຸງທັງໝົດ 12 ມາດຕາ ຄື: ມາດຕາ 3, 13, 42, 48, 53, 56, 59, 60, 77, 78 ແລະ 91, ໂດຍໄດສະເໜີຂໍກວດກາຄວາມສອດຄ່ອງຜ່ານກະຊວງຍຸຕິທໍາ (ຕາມໜັງສືສະເໜີສະບັບ ເລກທີ 1656/ພບ, ລົງວັນທີ 16 ສິງຫາ 2022), ແຕ່ຜ່ານການປຶກສາຫາລືຂອງກອງປະຊຸມລັດຖະບານ ເຫັນວ່າການປັບປຸງດັ່ງກ່າວ ໂດຍລວມ ແລ້ວເຫັນວ່າຍັງບໍ່ຕອບສະໜອງໄດ້ກັບການແກ້ໄຂວາລະແຫ່ງຊາດ ແລະ ເຫັນຄວນຍົກລະດັບການປັບປຸງດັ່ກ່າວໃຫ້ເປັນການປັບປຸງເນື້ອໃນທັງໝົດຂອງກົດໝາຍ.
ຈາກນັ້ນ, ຄະນະຄົ້ນຄວ້າ ຈື່ງໄດ້ນໍາເອົາເນື້ອໃນຈິດໃຈຊີ້ນໍາດັ່ງກ່າວດໍາເນີນການນຄວ້າ ຄືນໂດຍໄດ້ຈັດກອງ ປະຊຸມວິຊາກາກຂື້ນນ 11 ຄັ້ງ (ຢູ່ກົມຄຸ້ມຄອງບໍ່ແຮ່ 10 ຄັ້ງ ແລະ ວັງວຽງ 1 ຄັ້ງ, ໃນນັ້ນເປັນກອງປະຊຸມຄົບຄະນະ 2 ຄັ້ງ) ແລະ ໄດ້ເປັນເອກະພາບສະເໜີໃຫ້ມີການປັບປຸງ ຈໍານວນ 23 ມາດຕາ ຄື: ມາດຕາ 3, 29, 39, 42, 43, 49, 50, 52, 53, 54, 55, 56, 59, 60, 62, 64, 65, 67, 77, 78, 90, 91 ແລະ 99. ເຊິ່ງເນື້ອໃນຕົ້ນຕໍ ຂອງການປັບປຸງ ແມ່ນຕິດພັນກັບ: ການເປີດໃຫ້ມີການພັດທະນາແຮ່ທາດຫາຍາກ, ການໂຮມກິດຈະການຊອກຄົ້ນແລະ ສໍາຫຼວດເຂົ້າກັນ, ການຫຼຸດຜ່ອນອາຍຸການອອກອະນຸຍາດ, ການຫຼຸດເນື້ອທີ່ອະນຸຍາດໃຫ້ສໍາປະທານສໍາຫຼວດ, ການເພີ່ມເນື້ອທີ່ອະນຸຍາດໃຫ້ດໍາເນີນກິດຈະການກ່ຽວກັບແຮ່ທາດປະເພດອະໂລຫະ, ການກໍານົດສິດພາລະບົດບາດໃນການຄຸ້ມຄອງການປຸງແຕ່ງແຮ່ທາດ ແລະ ການປັບປຸງຄໍາສັບໃຫ້ສອດຄ່ອງຕາມມາດຕະຖານທາງດ້ານເຕັກນິກ.
ມາເຖິງປະຈຸບັນການປັບປຸງເນື້ອໃນກົດໝາຍວ່າດ້ວຍແຮ່ທາດດັ່ງກ່າວ ແມ່ນໄດ້ສໍາເລັດ ໂດຍພື້ນຖານ ແລະ ເພື່ອຮັບປະກັນໃຫ້ກົດໝາຍວ່າດ້ວຍແຮ່ທາດດັ່ງກ່າວ ມີເນື້ອໃນຄົບຖ້ວນສົມບູນ, ສອດຄ່ອງຕາມທິດທາງນະໂຍບາຍ ຂອງລັດຖະບານ; ກະຊວງພະລັງງານ ແລະ ບໍ່ແຮ່ ຈື່ງໄດ້ນໍາສະເໜີຜ່ານເນື້ອໃນການປັບປຸງຕໍ່ກອງປະຊຸມທາບທາມ ເປີດກວ້າງໃນຄັ້ງນີ້.
ສໍາລັບແຜນການໃນຕໍ່ໜ້າ, ພາຍຫຼັງສາເລັດກອງປະຊຸມທາບທາມເປີດກ້ວາງໃນຄັ້ງນີ້ ແມ່ນຄາດວ່າຈະໄດ້ສືບຕໍ່ ່ເປີດກອງປະຊຸມທາບທາມເປີດກວ້າງອີກ 2 ຄັ້ງ ພາຍໃນເດືອນນີ້ຄື: ຢູ່ວັງວຽງ ແລະ ນະຄອນຫຼວງວຽງຈັນ, ຫຼັງຈາກນັ້ນຄະນະຮັບຜິດຊອບຈະໄດ້ນໍາເອົາບັນດາຄໍາຄິດຄໍາເຫັນ ໄປເປັນບ່ອນອີງໃນການຄົ້ນຄວ້າ ປັບປຸງຄືນ. ຈາກນັ້ນ, ໄດ້ນໍາສະເໜີໄປຍັງກະຊວງຍຸຕິທໍາ, ລັດຖະບານ ແລະ ສະພາແຫ່ງຊາດ ເພື່ອພິຈາລະນາຂັ້ນຕໍ່ໄປ.
ພາບ ແລະ ຂ່າວ: ວຽງສະຫວັນ ປຣະດິດ
