ຊຸດຝຶກອົບວຽກງານກວດກາກຳມະບານ ໃຫ້ບັນດາໜ່ວຍຮາກຖານ ກຳມະບານອ້ອມຂ້າງກະຊວງ ພະລັງງານ ແລະ ບໍ່ແຮ່ ໄດ້ຈັດຂຶ້ນໃນວັນທີ 21 ກໍລະກົດ 2023 ຢູ່ຫ້ອງປະຊຸມໃຫຍ່ຊັ້ນ5 ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ບົວເທບ ມາໄລຄໍາ ຮອງປະທານຄະນະບໍລິຫານງານສະຫະພັນກໍາມະບານກະຊວງ, ປະທານກວດກາ ສະຫະພັນກໍາມະບານກະຊວງພະລັງງານແລະບໍ່ແຮ່ ແລະ ສະຫາຍ ທອງພີມ ວົງລະພາ ຄະນະບໍລິຫານງານສູນກາງສະຫະພັນກຳມະບານລາວ , ຮອງປະທານກວດກາຄະນະບໍລິຫານງານສູນກາງສະຫະພັນກຳມະບາານລາວ , ຫົວໜ້າກົມກວດກາ, ສູນກາງສະຫະພັນກໍາມະບານລາວ, ມີຄະນະບໍລິຫານສະຫະພັນກໍາມະບານກະຊວງ, ຄະນະກວດກາກໍາມະບານຮາກຖານ ແລະ ສະມາຊິກກໍາມະບານອ້ອມຂ້າງກະຊວງເຂົ້າຮ່ວມ.
ສະຫາຍ ບົວເທບ ມາໄລຄໍາ ຮອງປະທານຄະນະບໍລິຫານງານສະຫະພັນກໍາມະບານກະຊວງ, ປະທານກວດກາ ສະຫະພັນກໍາມະບານກະຊວງພະລັງງານແລະບໍ່ແຮ່ ກ່າວເປີດກອງປະຊຸມວ່າ: ຄືດັ່ງພວກເຮົາຮັບຊາບນໍາກັນດີແລ້ວວ່າ: ວຽກງານກຳມະບານ ແມ່ນນຶ່ງໃນ ອົງການຈັດຕັ້ງມະຫາຊົນ ທີ່ມີຄວາມສຳຄັນ ຕໍ່ການພັດທະນາເສດຖະກິດ-ສັງຄົມ ຢູ່ປະເທດເຮົາ ແລະ ເປັນອົງການຈັດຕັ້ງທີ່ໃຫ່ຍກວ່າອົງການຈັດຕັ້ງອື່ນ ແລະ ແນ່ນອນວຽກງານກວດກາ ແມ່ນມີຄວາມສຳຄັນທີ່ສຸດ ຈົນກາຍເປັນຫລັກການທີ່ວ່າ : ບ່ອນໃດທີ່ບໍ່ມີການກວດກາ ແມ່ນ ບ່ອນນັ້ນ ບໍ່ມີການນຳພາ ແລະ ແນ່ນອນຈະພາໃຫ້ເກີດມີປະກົດການຫຍໍ້ທໍ້ , ການກວດກາ ແມ່ນການ ຊອກຫາຈຸດຫຍຸ້ງຍາກ ເພື່ອນຳມາປັບປຸງໃຫ້ດີ ແລະ ໃຫ້ທັນກັບສະພາບການ .
ອົງການສະຫະພັນກຳມະບານລາວ ແມ່ນໄດ້ສ້າງຕັ້ງຂື້໊ນ ໃນວັນທີ່ 1 ກຸມພາ 1956 ແລະ ໃນວັນທີ່ 1 ກຸມພາ 2023 ນີ້ ກໍ່ຄົບຮອບ 67 ປີ ທີ່ເຕີ່ມໃຫ່ຍຂະຫຍາຍຕົວມາຢ່າງເຂັ້ມແຂງ ແລະ ແຕ່ລະປີກໍ່ໄດ້ມີການ ສະເຫລີມສະລອງ ວັນສຳຄັນດັ່ງກ່າວ.
ວຽກງານກວດກາກໍາມະບານກໍ່ເປັນວຽກໜຶ່ງທີ່ສຳຄັນ ໃນການຊຸກຍູ້ໃຫ້ການຈັດຕັ້ງປະຕິບັດມະຕິກອງຊຸມ ແລະ ຜັນຂະຫຍາຍແນວທາງນະໂຍບາຍຂອງພັກ-ລັດ, ໃນການຄຸ້ມຄອງລັດ ແລະ ສັງຄົມ ດ້ວຍລັດຖະທຳມະນູນ ແລະ ກົດໝາຍ ແນ່ໃສ່ການປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ໃຫ້ບັນລະຕາມເປົ້າຫມາຍແລະຈຸດປະສົງທີ່ວາງໃວ້.
ໃນກົດລະບຽບ ຂອງສະຫະພັນກຳມະບານລາວ ສະໄຫມທີ່ VIII ສະບັບເລກທີ່ : 068/ສກລ ລົງວັນທີ່ 21 ມັງກອນ 2021 ແລະ ໃນ ໝວດທີ່ XII ກ່ຽວກັບ ຄະນະກວດກາ ວຽກງານກຳມະບານລາວ ຕາມມາດຕາ 54 ວ່າດ້ວຍ ຄະນະກວດກາ ວຽກງານກໍາມະບານ ,ມາດຕາ 55 ວ່າດ້ວຍສິດ ແລະ ຫນ້າທີ່ ຂອງຄະນະກວດກາວຽກງານກໍາມະບານ , ມາດຕາ 56 ວ່າດ້ວຍເນື້ອໃນກວດກາວຽກງານກຳມະບານ ແລະ ອື່ນໆ ແຕ່ ຄະນະກວດກາກຳມະບານ ແລະ ສະມາຊິກກຳມະບານຈາກກະຊວງພະລັງງານແລະບໍ່ແນ່ ຈະບໍ່ເຂົ້າໃຈລະອຽດເລິກເຊິງ ຍ້ອນແນວນັ້ນ ຈຶ່ງເຫັນມີຄວາມຈຳເປັນໃນການສ້າງຄວາມເຂັ້ມແຂງໃນວຽກງານກວດກາກໍາມະບານ ໃຫ້ກັບຄະນະກວດກາກຳມະບານ ພາຍໃນຂະແໜງ ພະລັງງານ ແລະ ບໍ່ແຮ່ ໃນມື້໊ນີ້.
ພາບ: ວຽງສະຫວັນ ປຣະດິດ
ຂ່າວ: ຄໍາແສງ ແກ້ວປະເສີດ
