ວັນທີ 17 ສິງຫາ 2023 ທີ່ຜ່ານມາ ກົມນະໂຍບາຍ ແລະ ແຜນພະລັງງານ, ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມປຶກສາຫາລືເພື່ອເກັບກຳຂໍ້ມູນ ແລະ ສ້າງລະບຽບການກ່ຽວກັບວຽກງານການບໍລິຫານຈັດການນໍ້າ ເພື່ອການຜະລິດໃຫ້ໄດ້ຮັບຜົນປະໂຫຍດສູງສຸດ ຂອງບັນດາເຂື່ອນໄຟຟ້າພະລັງນໍ້າ ທາງພາກເໜືອ. ເຊິ່ງໄດ້ຈັດຂື້ນຢູ່ທີ່ ຫ້ອງປະຊຸມຂອງພະແນກພະລັງງານ ແລະ ບໍ່ແຮ່ ແຂວງ ຫຼວງພະບາງ ໂດຍເປັນປະທານ ຂອງ ທ່ານ ວິທູນລະບັນດິດ ປະທຸມມະບຸດ ຮອງຫົວໜ້າກົມນະໂຍບາຍ ແລະ ແຜນພະລັງງານ ແລະ ປະທານຮ່ວມຂອງ ທ່ານ ມີໄຊພອນ ວິໄລຫົງ ຮອງຫົວໜ້າພະແນກພະລັງງານ ແລະ ບໍ່ແຮ່ ແຂວງ ຫຼວງພະບາງ ໂດຍມີຜູ້ຕາງໜ້າເຂົ້າຮ່ວມ ຈາກສູນກາງ ມີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ : ກົມຊັບພະຍາກອນນໍ້າ, ກົມອຸຕຸນິຍົມ ແລະ ກົມອຸທົກກະສາດ, ຈາກ ກະຊວງກະສິກຳ ແລະ ປ່າໄມ້: ກົມຊົນລະປະທານ,ຈາກກະຊວງພະລັງງານ ແລະ ບໍ່ແຮ່ ມີ: ກົມຄຸ້ມຄອງຄວາມປອດໄພອຸດສາຫະກຳພະລັງງານ, ກົມຄຸ້ມຄອງພະລັງງານ, ກົມກວດກາ ແລະ ຍັງມີຕາງໜ້າຈາກທ້ອງຖິ່ນມີ ພະແນກພະລັງງານ ແລະ ບໍ່ແຮ່, ພະແນກກະສິກຳ ແລະ ປ່າໄມ້, ພະແນກຊັບພະຍາກອນທຳ ມະຊາດ ແລະ ສິ່ງແວດລ້ອມ ແລະ ລັດວິສາຫະກິດນໍ້າປະປາ ພ້ອມດ້ວຍຜູ້ຕາງໜ້າຈາກບັນດາໂຄງການຕັ້ງຢູ່ 6 ແຂວງພາກເໜືອ ເຂົ້າຮ່ວມຈໍານວນ 43 ທ່ານ.
