ວັນທີ 19 ກັນຍາ 2023 ນີ້ ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ໄດ້ເຄື່ອນໄຫວຕິດຕາມຊຸກຍູ້ການຈັດຕັ້ງປະຕິບັດວຽກງານພະລັງງານ ແລະ ບໍ່ແຮ່ ຢູ່ແຂວງອຸດົມໄຊ ໂດຍໃຫ້ການຕອນຮັບ ຂອງ ທ່ານ ອາລຸນ ບຸນວິໄລ ຫົວໜ້າພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ພ້ອມຄະນະພະແນກ ຕະຫຼອດຮອດພະນັກງານລັດຖະກອນເຂົ້າຮ່ວມ.
ໃນໂອກາດນີ້, ທ່ານ ອາລຸນ ບຸນວິໄລ ຫົວໜ້າພະແນກ ພະລັງງານ ແລະ ບໍ່ແຮ່ ແຂວງອຸດົມໄຊ ໄດ້ລາຍງານຫຍໍ້ກ່ຽວກັບການັຈັດຕັ້ງປະຕິບັດວຽກງານພະລັງງານ ແລະ ບໍ່ແຮ່ ຢູ່ແຂວງອຸດົມໄຊ ບາງຕອນ ທ່ານ ໄດ້ກ່າວວ່າ: ດ້ວຍຄວາມເອົາໃຈໃສ່ຂອງ ຄະນະພັກ, ຄະນະນຳທຸກຂັ້ນ ຕະຫຼອດຮອດພະນັກງານ-ລັດຖະກອນໃນຂົງເຂດພະລັງງານ ແລະ ບໍ່ແຮ່ ໄດ້ພ້ອມກັນສຸມທຸກກຳລັງຕາມພາລະບົດບາດ, ສິດ ແລະ ໜ້າທີ່ຂອງຕົນສາມາດປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງ ຊຶ່ງໃນໄລຍະ 6 ເດືອນຕົ້ນປີ 2023 ສາມາດຍາດໄດ້ຜົນງານຫຼາຍດ້ານເຊັ່ນ: ລວມຍອດມູນຄ່າ ການຜະລິດຂອງຂະແໜງພະລັງງານ ແລະ ບໍ່ແຮ່ປະຕິບັດໄດ້ທັງໝົດ 926,78 ຕື້ກວ່າກີບ ທຽບໃສ່ໄລຍະດຽວກັນຂອງປີ 2022 ເພີ່ມຂຶ້ນ 178,67%, ທຽບໃສ່ແຜນປີ 2023 ປະຕິບັດໃຫ້ໄດ້ 732,56 ຕື້ກວ່າກີບ ເຫັນວ່າປະຕິບັດບັນລຸ 126,51%. ໃນນີ້, ຂະແໜງພະລັງງານ ປະຕິບັດໄດ້ 73,51 ຕື້ກວ່າກີບ ແລະ ຂະແໜງບໍ່ແຮ່ ປະຕິບັດໄດ້ 853,26 ຕື້ກວ່າກີບ.
ຫຼັງຈາກນັ້ນ, ທ່ານ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍ່ໄດ້ມີຄຳເຫັນໂອ້ລົມ ແລະ ຍ້ອງຍໍຊົມເຊີຍຜົນງານການຈັດຕັ້ງປະຕິບັດວຽກງານຂອງແຕ່ລະຂະແໜງການດ້ວຍຄວາມຮັບຜິດຊອບສູງສາມາດຍາດໄດ້ຜົນງານຫຼາຍດ້ານ, ພ້ອມເນັ້ນໃຫ້ພະນັກງານທຸກຂະແໜງການຈົ່ງຍົກສູງພາລະບົດບາດວຽກງານພະລັງງານ ແລະ ບໍ່ແຮ່, ເອົາໃຈໃສ່ຕິດຕາມກວດກາບັນດາໂຄງການລົງທຶນຂອງເອກະຊົນໃຫ້ຖືກຕ້ອງໂປ່ງໃສ, ການປັບປຸງດ້ານບຸກຄະລາກອນເພື່ອໃຫ້ແທດເໝາະກັບໜ້າວຽກຕົວຈິງ, ສູ້ຊົນເຮັດໃຫ້ຕົວເລກຄາດໝາຍບັນລຸຕາມແຜນການ, ການຄຸ້ມຄອງບັນດາໂຄງການລົງທຶນໃຫ້ໄດ້, ນຳໃຊ້ໃຫ້ເປັນເຮັດໃຫ້ມີຄຸນຄ່າສູງທາງດ້ານເສດຖະກິດ, ສົມທົບກັບບໍລິສັດລັດວິສາຫະກິດໄຟຟ້າລາວປັບປຸງກະກຽມຄວາມພ້ອມບໍລິການສັງຄົມໃຫ້ພຽງພໍ ບໍ່ໃຫ້ມີບັນຫາໄຟບໍ່ພໍ, ການຄິດໄລຄ່າໄຟຟ້າຕ້ອງຫຼີ້ກລ້ຽງບໍໃຫ້ມີຂໍ້ຜິດພາດ, ຍົກສູງການປະສານງານກັບທ້ອງຖິ່ນຢ່າງເລິກເຊິງຫຼີ້ກລ້ຽງບັນຫາຫາງສຽງຈົ່ມວ່າຂອງສັງຄົມ, ຜົນກະທົບທາງດ້ານສິ່ງແວດລ້ອມ, ຮ່ວມກັບຂະແໜງການກ່ຽວຂ້ອງແກ້ໃຫ້ທັນເວລາ, ປະຕິບັດໜ້າທີ່ຂອງຕົນເອງໃຫ້ມີປະສິດທິພາບ ສ້າງຄວາມສາມັກຄີພາຍໃນ ພາຍນອກ, ການປະສານສົມທົບກັບອົງການທີ່ກ່ຽວຂ້ອງແຕ່ສູນກາງລົງຮອດທ້ອງຖິ່ນໃຫ້ມີຄວາມກົ່ມກຽວ ເພື່ອພັດທະນາວຽກງານພະລັງງານ ແລະ ບໍ່ແຮ່ ແຂວງອຸດົມໄຊ ນັບມື້ມີບາດກ້າວໃຫ່ມ.
ພາບ ແລະ ແຫຼ່ງຂ່າວ: ສະຖານີວິທະຍຸແຂວງ ອຸດົມໄຊ
ຮຽບຮຽງ: ຄຳແສງ ແກ້ວປະເສີດ
