ໃນວັນທີ 06 ພະຈິກ 2023 ທີ່ຫ້ອງຮັບແຂກ ກະຊວງພະລັງງານ ແລະ ບໍ່ແຮ່ ທ່ານ ຫງວຽນ ຮວ່າງ ແອັງ, ກຳມະການສູນການພັກຄອມມູນິດຫວຽດນາມ, ປະທານຄະນະກຳມະການຄຸ້ມຄອງທຶນຢູ່ວິສາຫະກິດຫວຽດນາມ ພ້ອມດ້ວຍຄະນະ ເຂົ້າຢ້ຽມຢາມ, ພົບປະການນຳກະຊວງພະລັງງານ ແລະ ບໍ່ແຮ່ ເນື່ອງໃນໂອກາດທີ່ ຄະນະມາຢ້ຽມຢາມ ແລະ ເຮັດວຽກທາງລັດຖະການຢູ່ ສປປ ລາວ.
ໃນໂອກາດດັ່ງກ່າວ, ທ່ານ ຫງວຽນ ຮວ່າງ ແອັງ, ໄດ້ສະເໜີຈຸດປະສົງຂອງການມາພົບປະ ແລະ ຢ້ຽມຢາມກະຊວງພະລັງງານ ແລະ ບໍ່ແຮ່ ໃນຄັ້ງນີ້, ກໍ່ເພື່ອທົບທວນຄືນ ການຈັດຕັ້ງປະຕິບັດວຽກງານການຮ່ວມມື ລະຫວ່າງ ສອງລັດຖະບານ ລາວ ແລະ ຫວຽດນາມ ໃນໄລຍະຜ່ານມາ ໃນຂະແໜງພະລັງງານ ແລະ ບໍ່ແຮ່ ໂດຍສະເພາະແມ່ນ ການລົງທຶນຂະແໜງທໍລະນີສາດ ແລະ ບໍ່ແຮ່ ທີ່ ແຂວງ ຄຳມ່ວນ.
ຂະນະດຽວກັນ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ສະແດງຄວາມຕ້ອນຮັບ ແລະ ຊົມເຊີຍ ທ່ານ ຫງວຽນ ຮວ່າງ ແອັງ, ທີ່ໄດ້ມາພົບປະ, ຢ້ຽມຢາມກະຊວງພະລັງງານ ແລະ ບໍ່ແຮ່ ໃນຄັ້ງນີ້. ພ້ອມກັນນີ້, ທ່ານ ຮອງລັດຖະມົນຕີ ກໍ່ໄດ້ລາຍງານ ຫຍໍ້ຜົນສຳເລັດ ແລະ ທິດທາງແຜນການພັດທະນາພະລັງງານ ແລະ ບໍ່ແຮ່ ຢູ່ ສປປ ລາວ ໃນນີ້, ທ່ານ ຮອງລັດຖະມົນຕີ ໄດ້ເນັ້ນໃສ່ກ່ຽວກັບແຜນການຮ່ວມມືໃນຕໍ່ໜ້າ ລະຫວ່າງ ສອງປະເທດ ໂດຍສະເພາະແມ່ນການຮ່ວມມືໃນຂົງເຂດພະລັງງານ ແລະ ບໍ່ແຮ່ ໃຫ້ ທ່ານ ປະທານຄະນະກຳມະການຄຸ້ມຄອງທຶນຢູ່ວິສາຫະກິດຫວຽດນາມ ໄດ້ຮັບຊາບ.
