ພິທີດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 07 ພະຈິກ 2023 ຢູ່ຫ້ອງປະຊຸມໃຫ່ຍຊັ້ນ 5 ກະຊວງ ພະລັງງານ ແລະ ບໍ່ແຮ່ ໃຫ້ກຽດເຂົ້າຮ່ວມເປັນປະທານຂອງ ສະຫາຍ ໂພໄຊ ໄຊຍະສອນ, ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ພະລັງງານ ແລະ ບໍ່ແຮ່, ມີຄະນະປະຈຳພັກ, ຄະນະພັກກະຊວງ, ພະນັກງານນຳພາຈາກຫ້ອງການ, ບັນດາກົມ, ສະຖາບັນ, ລັດວິສາຫະກິດ ອ້ອມຂ້າງກະຊວງ ແລະ ຜູ້ຕາງໜ້າຈາກຄະນະຈັດຕັ້ງສູນກາງພັກ ເຂົ້າຮ່ວມ.
ໃນພິທີອັນມີກຽດສະຫງ່ານີ້, ສະຫາຍ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານການນຳຂັ້ນສູກະຊວງພະລັງງານ ແລະ ບໍ່ແຮ່ ພັກການຮັບອູດໜູນບຳນານ ໃນນີ້ນາຍົກລັດຖະມົນຕີ ໄດ້ຕົກລົງອະນຸມັດໃຫ້ ສະຫາຍ ນາງ ຈັນສະຫວາດ ບຸບຜາ ຄະນະປະຈຳພັກ, ປະທານກວດກາພັກກະຊວງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພັກການເພື່ອຮັບອູດໜູນບຳນານ ຕາມນະໂຍບາຍຂອງພັກ, ລັດຖະບານ. ຫຼັງຈາກນັ້ນ ສະຫາຍ ທອງຂັນ ພິມວິໄລ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ຂຶ້ນຜ່ານຂໍ້ຕົກລົງວ່າດ້ວຍນະໂຍບາຍເຂົ້າຮັບອູດໜູນບຳນານຢ່າງເປັນທາງການ.
ສະຫາຍ ນາງ ຈັນສະຫວາດ ບຸບຜາ ໄດ້ສະແດງຄວາມຮູ້ບຸນຄຸນຢ່າງສູງຕໍ່ພັກ-ລັດ ເວົ້າລວມ ເວົ້າສະເພາະຕໍ່ຄະນະພັກ, ຄະນະນຳກະຊວງພະລັງງານ ແລະ ບໍ່ແຮ່ ທີ່ໄດ້ຝຶກຝົນຫຼໍ່ຫຼ້ອມ ແລະ ກໍ່ສ້າງຕົນເອງ ຈາກພະນັກງານວິຊາການ ຈົນກາຍເປັນພະນັກງານນຳພາ ແລະ ການນຳຂັ້ນສູງ ຢູ່ໃນຂົງເຂດພະລັງງານ ແລະ ບໍ່ແຮ່. ພ້ອມກັນນີ້, ສະຫາຍ ຍັງໄດ້ຍົກໃຫ້ເຫັນເຖິງຜົນງານການເຄື່ອນໄຫວຂອງຕົນ ທີ່ໄດ້ອຸທິດເຫືອແຮງ, ສະຕິປັນຍາ ແລະ ຄວາມຮູ້, ຄວາມສາມາດເຂົ້າໃນການພັດທະນາວຽກງານພະລັງງານ ແລະ ບໍ່ແຮ່ ຕະຫຼອດໄລຍະການເປັນພະນັກງານ-ລັດຖະກອນຢູ່ກະຊວງພະລັງງານ ແລະ ບໍ່ແຮ່ ດ້ວຍຄວາມເອົາໃຈໃສ່, ຈົ່ງຮັກພັກດີ ແລະ ເຊີດຊູມະນະຈິດຂອງຕົນຢ່າງເຕັມປ່ຽມ ແລະ ເຕັມໄປດ້ວຍຄວາມມຸ້ງ ໝາດປາດຖະໜາ ທີ່ຈະພັດທະນາຂະແໜງການ ກໍ່ຄືປະເທດຊາດໃຫ້ຈະເລີນຮຸ່ງເຮືອງ ສິວິໄລຕາມທິດການກ້າວຂຶ້ນສັງຄົມນິຍົມຢ່າງໜັກແໜ້ນ.
ສະຫາຍ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ຕາງໜ້າໃຫ້ຄະນະພັກ, ຄະນະນຳ ແລະ ພະນັກງານລັດຖະກອນ, ກຳມະກອນ ໃນທົ່ວຂົງເຂດພະລັງງານ ແລະ ບໍ່ແຮ່ ຕີລາຄາສູງຕໍ່ຜົນງານອັນຍິ່ງໃຫຍ່ ໃນການປະກອບສ່ວນພັດທະນາວຽກງານພະລັງງານ ແລະ ບໍ່ແຮ່ ຢ່າງບໍ່ຮູ້ອິດຮູ້ເມື່ອຍຂອງ ສະຫາຍ ນາງ ຈັນສະຫວາດ ບຸບຜາ ວ່າ: ໃນນາມການຈັດຕັ້ງ ກໍ່ຄືຂະແໜງການພະລັງງານ ແລະ ບໍ່ແຮ່ ຂອງພວກເຮົາຂ້າພະເຈົ້າກໍ່ສຸດແຕ່ ເສຍດາຍທີ່ ສະຫາຍ ນາງ ຈັນສະຫວາດ ບຸບຜາ, ອະດີດຄະນະປະຈໍາພັກກະຊວງ, ອະດີດປະທານກວດກາພັກກະຊວງ, ອະດີດຮອງລັດຖະມົນຕີກະຊວງພະລັງງານ ແລະ ບໍ່ແຮ່, ຈະໄດ້ເຂົ້າຮັບອຸດໜູນບໍານານແລ້ວ ຂະແໜງການເຮົາກໍ່ຈະຂາດພະນັກງານຫຼັກແຫຼ່ງຜູ້ທີ່ມີທັງຄວາມຮູ້, ຄວາມສາມາດ ແລະ ປະສົບການສູງ ທີ່ໄດ້ຊ່ວຍຍູ້ໜູນ ຊີ້ນໍາຂະແໜງການເຮົາຕະຫຼອດຫຼາຍປີທີ່ຜ່ານມາ ໂດຍສະເພາະຂະແໜງການທໍລະນີສາດ ແລະ ບໍ່ແຮ່ ທີ່ສະຫາຍເຄີຍປະກອບສ່ວນຕັ້ງແຕ່ເປັນວິຊາການ ນໍາກົມທໍລະນີສາດ ແລະ ແຮ່ທາດ ໄດ້ຍົກຍ້າຍໄປຢູ່ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ສະຫາຍກໍ່ໄດ້ເປັນກໍາລັງແຮງໃນການໄປຊ່ວຍຊີ້ນໍາວຽກງານດັ່ງກ່າວໃຫ້ເຂັ້ມແຂງຂື້ນໃນສະພາບການທີ່ພວມມີການຊັບຊ້ອນຍົກຍ້າຍວຽກງານທີ່ຊັບສົນພໍສົມຄວນ. ຫຼັງຈາກນັ້ນ, ສະຫາຍກໍ່ໄດ້ກັບຄືນມາຢູ່ກະຊວງພະລັງງານ ແລະ ບໍ່ແຮ່ຂອງພວກເຮົາ ເພື່ອມາຊ່ວຍຊີ້ນໍາວຽກງານກວດກາ, ທັງເປັນຄະນະກໍາມະການສະຫະພັນແມ່ຍິງສູນກາງ ເປັນປະທານສະຫະພັນແມ່ຍິງກະຊວງ ແລະ ເປັນປະທານກໍາມາທິການສົ່ງເສີມຄວາມກ້າວໜ້າແມ່ຍິງ ແລະ ເດັກນ້ອຍຂອງກະຊວງ ສະຫາຍກໍ່ໄດ້ເປັນຜູ່ພັກດັນຫຼັກ ໃຫ້ແມ່ຍິງໃນ ຂະແໜງການເຮົາມີບົດບາດ ຄວາມຮູ້ຄວາມສາມາດເທົ່າທຽມກັບເພດຊາຍ ແລະ ຊ່ວຍສ້າງມູນເຊື້ອຊຸກຍູ້ໃຫ້ ທຸກຄາດໝາຍຂອງສະຫະພັນແມ່ຍິງກະຊວງສໍາເລັດຢູ່າງຈົບງາມ.
