ໃນວັນທີ 08-10 ພະຈິກ 2023 ກົມຄຸ້ມຄອງຄວາມປອດໄພອຸດສາຫະກຳພະລັງງານ (ກປພ) ກະຊວງ ພະລັງງານ ແລະ ບໍ່ແຮ່ ໄດ້ຈັດກອງປະຊຸມເຜີຍແຜ່ກົດໝາຍ, ບັນດານິຕິກໍາ, ລະບຽບການ ໃນການຄຸ້ມຄອງຄວາມປອດໄພຂອງເຂື່ອນ ແລະ ແຜນຮັບມືກໍລະນີສຸກເສີນ ໃຫ້ແກ່ພະນັກງານ ພະແນກ ພະລັງງານ ແລະ ບໍ່ແຮ່ 6 ແຂວງ ພາກກາງ ແລະ ພາກໃຕ້ ໄດ້ແກ່: ແຂວງ ຄຳມ່ວນ, ແຂວງ ສະຫວັນນະເຂດ, ແຂວງ ຈຳປາສັກ, ແຂວງ ສາລະວັນ ແຂວງ ເຊກອງ ແລະ ແຂວງ ອັດຕະປື ຈັດຂື້ນທີ່ຫ້ອງປະຊຸມສະພາ ແຂວງ ເຊກອງ, ໃນກອງປະຊຸມໃຫ້ກຽດເປັນປະທານຮ່ວມຂອງ ທ່ານ ບົວເທບ ມາໄລຄຳ ຫົວໜ້າກົມຄຸ້ມຄອງຄວາມປອດໄພອຸດສາຫະກຳພະລັງງານ ແລະ ທ່ານ ພິມວົງ ຊວງມະນີ ຮອງຫົວໜ້າພະແນກພະລັງງານ ແລະ ບໍ່ແຮ່ ແຂວງ ເຊກອງ. ຈຸດປະສົງ ແມ່ນເຜີຍແຜ່ກົດໝາຍ, ບັນດານິຕິກໍາ, ລະບຽບການ ໃນການຄຸ້ມຄອງຄວາມປອດໄພຂອງເຂື່ອນ ແລະ ແຜນຮັບມືກໍລະນີສຸກເສີນ ໃຫ້ພະແນກ ພະລັງງານ ແລະ ບໍ່ແຮ່ ຮັບຊາບ ແລະ ເຂົ້າໃຈໃນເນື້ອໃນຂອງກົດໝາຍ ແລະ ລະບຽບການດັ່ງກ່າວໃນແຕ່ລະມາດຕາ ພ້ອມທັງໄດ້ແລກປ່ຽນປືກສາຫາລື, ຖອດຖອນບົດຮຽນ ແລະ ແລກປ່ຽນຄຳຄິດເຫັນ ໃນວຽກງານການຄຸ້ມຄອງຄວາມປອດໄພຂອງເຂື່ອນໃນຂອບເຂດຄວາມຮັບຜິດຊອບຂອງຕົນ ເພື່ອເຮັດໃຫ້ໂຄງການເຂື່ອນໄຟຟ້າມີຄວາມໜັ້ນຄົງ ແລະ ປອດໄພ.
