ສະຫາຍ ຄານນະຄອນ ເພັງສະຫວັດ ໄດ້ຮັບເລືອກຕັ້ງເປັນ ເລຂາ ຄະນະບໍລິຫານງານ ຊປປລ ຮາກຖານ ບໍລິສັດຜະລິດໄຟຟ້າລາວມະຫາຊົນ ອີກສະໄໝ

ສະຫາຍ ຄານນະຄອນ ເພັງສະຫວັດ ໄດ້ຮັບເລືອກຕັ້ງເປັນ ເລຂາ ຄະນະບໍລິຫານງານ ຊປປລ ຮາກຖານ ບໍລິສັດຜະລິດໄຟຟ້າລາວມະຫາຊົນ ອີກສະໄໝ

          ກອງປະຊຸມໃຫ່ຍຜູ້ແທນຊາວໜຸ່ມ ຄັ້ງທີ I ຂອງ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຮາກຖານ ບໍລິສັດ ຜະລິດໄຟຟ້າລາວ ມະຫາຊົນ, ໄດ້ໄຂຂື້ນ ແລະ ອັດລົງດ້ວຍຜົນສຳເລັດຢ່າງຈົບງາມ ໃນຕອນເຊົ້າເປັນ ຂອງ ວັນທີ 28 ພະຈິກ 2023 ຢູ່ທີ່ ຫ້ອງປະຊຸມໃຫຍ່ຂອງ ລັດວິສາຫະກິດ ໄຟຟ້າລາວ ພາຍໃຕ້ການເປັນປະທານ ຂອງ: ສະຫາຍ ຄານນະຄອນ ເພັງສະຫວັດ ເລຂາ ຄະນະບໍລິຫານງານ ຊປປລ ຮາກຖານ ບໍລິສັດຜະລິດໄຟຟ້າລາວມະຫາຊົນ. ໃຫ້ກຽດເຂົ້າຮ່ວມຂອງ ສະຫາຍ ຈັນທະເລດ ວໍລະບຸດ ກຳມະການ ຄະນະບໍລິຫານງານ ພັກກະຊວງ, ກຳມະການ ຄະນະບໍລິຫານງານສູນກາງຊາວໜຸ່ມ, ເລຂາຄະນະຄະນະບໍລິຫານງານ ຊາວໜຸ່ມປະຊາຊົນປະຕິວັດລາວ ກະຊວງພະລັງງານ ແລະ ບໍ່ແຮ່; ສະຫາຍ ວັນແສງ ວັນນະວົງ ຮອງເລຂາ ຄະນະພັກຮາກຖານ ບໍລິສັດ ຜະລິດ-ໄຟຟ້າລາວມະຫາຊົນ, ມີຫົວໜ້າຫ້ອງການຊາວໜຸ່ມກະຊວງ, ເລຂາ, ຮອງເລຂາ ຄະນະບໍລິຫານງານ ຊປປລ ຮາກຖານ, ໜ່ວຍຮາກຖານ ຊາວໜຸ່ມ ອ້ອມຂ້າງກະຊວງ ຕາງໜ້າອົງການຈັດຕັ້ງພາຄີ ກໍາມະບານ, ແມ່ຍິງ ຜ-ຟຟລ ພ້ອມດ້ວຍຜູ້ແທນກອງປະຊຸມໃຫຍ່ເຂົ້າຮວ່ມທັງໝົດ 112 ສະຫາຍ; ເປັນຜູ້ແທນສົມບູນຈຳນວນ 94 ສະຫາຍ, ຍິງ 48 ສະຫາຍນາງ.

          ກອງປະຊຸມໃຫຍ່ ໄດ້ຮັບຮອງເອົາບົດລາຍງານການເມືອງທັງສອງພາກ ຊຶ່ງເປັນພື້ນຖານໃຫ້ແກ່ການ ນຳພາ-ຊີ້ນຳ ວຽກງານຊາວໜຸ່ມ ຢູ່ ບໍລິສັດ ຜະລິດ-ໄຟຟ້າລາວ ມະຫາຊົນ ນຳສະເໜີໂດຍ ສະຫາຍ ຄານນະຄອນ ເພັງສະຫວັດ ເລຂາ ຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ຮາກຖານ ຜ-ຟຟລ. ບົດລາຍງານດັ່ງກ່າວໄດ້ຕີລາຄາຢ່າງມີພາວະວິໄສ ເຖິງຜົນສໍາເລັດ, ຂໍ້ສະດວກ, ຂໍ້ຫຍຸ້ງຍາກ ໃນການເຄື່ອນໄຫວວຽກງານຊາວໜຸ່ມຢູ່ພາຍໃນ ຜ-ຟຟລ. ໃນຕະລອດໄລຍະເວລາ 3 ປີ (2021-2023) ທີ່ຜ່ານມາ, ພ້ອມກັນນີ້ ກໍໄດ້ສະເໜີທິດທາງແຜນການ ນຳພາ-ຊີ້ນຳ ວຽກງານຊາວໜຸ່ມ ຜ-ຟຟລ, ໃນໄລຍະ 5 ປີ (2024-2029) ໃນຕໍ່ໜ້າ ໃຫ້ມີຄວາມເຂັ້ມແຂງ, ໜັກ ແໜ້ນ ແລະ ມີການຫັນປ່ຽນຢ່າງຕັ້ງໜ້າ, ຫຼັງຈາກນັ້ນຜູ້ແທນກອງປະຊຸມໃຫຍ່ ກໍໄດ້ພ້ອມກັນປະກອບຄຳເຫັນຢ່າງກົງໄປກົງມາ ພ້ອມໄດ້ຮັບຮອງເອົາ ບົດລາຍງານ ແລະ ແຜນການ ດັ່ງກ່າວຢ່າງເປັນເອກະສັນ.

          ກອງປະຊຸມຍັງໄດ້ຮັບຟັງການປະກອບຄຳເຫັນ ຂອງ ສະຫາຍ ວັນແສງ ວັນນະວົງ ຮອງເລຂາ ຄະນະພັກຮາກຖານ ບໍລິສັດ ຜະລິດ-ໄຟຟ້າລາວມະຫາຊົນ, ສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ກັບຊາວ ໜຸ່ມ ທີ່ໄດ້ໝູນໃຊ້ສະຕິປັນຍາ ກຳລັງໜຸ່ມເຂົ້າໃນພາລະກິດ, ວິໄສທັດ ຂອງ ຜ-ຟຟລ ຢ່າງຂະຫຍັນຂັນແຂງຕະຫຼອດມາ ນອກນັ້ນ ສະຫາຍກໍຍັງໄດ້ເນັ້ນໃສ່ການປ່ອນບັດຄັດເລືອກເອົາຄະນະບໍລິຫານງານຊາວໜຸ່ມ ຊຸດໃໝ່, ແມ່ນຢາກໃຫ້ໄດ້ບຸກຄົນທີ່ມີຄວາມເອົາໃຈໃສ່ແທ້ໆ ມີນ້ຳໃຈເສຍສະລະ ມີສະຕິຕື່ນຕົວ ສະໝັກໃຈໃນການເຮັດພາລະບາດ ຂອງ ຊາວໜຸ່ມ ໃຫ້ສົມກັບທີ່ເປັນແຂນຂວາຂອງພັກ.
          ກອງປະຊຸມໃຫຍ່ ໄດ້ຮັບຟັງການລາຍງານ ບົດສຳຫຼວດການນຳພາລວມ ຂອງ ຄຊປປລ ຮາກຖານ ຜ-ຟຟລ ຊຸດທີ I ພ້ອມກັນນີ້, ຄະນະຊາວໜຸ່ມ ປະຊາຊົນປະຕິວັດລາວ ຮາກຖານ ຜ-ຟຟລ ຊຸດທີ I ກໍໄດ້ພ້ອມກັນກ່າວອຳລາໜ້າທີ່ ທີ່ ໄດ້ຮັບມອບໝາຍຕະຫຼອດໄລຍະເວລາ 3 ປີທີ່ຜ່ານມາ.
          ກອງປະຊຸມໄດ້ຮັບຟັງການປະກອບຄຳເຫັນຂອງ ຂອງ ສະຫາຍ ນາງ ປະພັດສອນ ບົວພິມ ຄະນະປະທານ ກຳມະບານ ຮາກຖານ ຜ-ຟຟລ ເຊິ່ງຕາງໜ້າໃຫ້ອົງການຈັດຕັ້ງພາຄີ. ກ່ອນອື່ນ ສະຫາຍ ສະແດງຄວາມຍ້ອງຍໍຊົມເຊີຍຜົນງານຂອງຊາວໜຸ່ມທີ່ຍາດມາໄດ້ ແລະ ໃຫ້ສືບຕໍ່ຮັກສາມູນເຊື້ອ ແລະ ເສີມຂະຫຍາຍຂໍ້ແຂ່ງຂັນໃຫ້ມີຄວາມຟົດຟື້ນກວ່າເກົ່າ, ການສ້າງຂະບວນການຕ່າງໆ ແມ່ນໃຫ້ມີສ່ວນຮ່ວມ ຂອງ 3 ອົງການຈັດຕັ້ງມະຫາຊົນ ຕິດພັນກັບວຽກງານວິຊາສະເພາະ ຂອງ ຜ-ຟຟລ ແລະ ຕິດພັນກັບຂໍ້ແຂ່ງຂັນຮັກຊາດ-ພັດທະນາ, ວຽກງານ 3 ສ້າງຂອງພັກ, ດ້ວຍຮູບການ 4 ບຸກ 5 ເປັນເຈົ້າ ແລະ ແມ່ຍິງ 3 ດີ.
          ພ້ອມກັນນີ້, ກອງປະຊຸມໃຫຍ່ ໄດ້ຈັດຕັ້ງພິທີ ມອບ-ຮັບ ໃບຍ້ອງຍໍໃຫ້ ກົມກອງ, ລວມໝູ່ ແລະ ບຸກຄົນດີເດັ່ນ ຜູ້ທີ່ມີຜົນງານໃນການປະກອບສ່ວນເຫື່ອແຮງ ແລະ ສະຕິປັນຍາເຂົ້າໃນການເຄື່ອນໄຫວວຽກງານຊາວໜຸ່ມ ຕະຫຼອດໄລຍະເວລາ 3 ປີທີ່ຜ່ານມາ. ໂດຍມີ ສະມາຊິກຊາວໜຸ່ມພາຍໃນຮາກຖານ ຜ-ຟຟລ ໄດ້ຮັບການຍ້ອງຍໍທັງໝົດ 139 ສະຫາຍ ເປັນຍິງ 72 ສະຫາຍນາງ ໃນນີ້ໄດ້ຮັບການຍ້ອງຍໍ ປະເພດ I ຈຳນວນ 121 ສະຫາຍ ເປັນຍິງ 64 ສະຫາຍນາງ, ປະເພດ II ຈຳນວນ 18 ສະຫາຍ ເປັນຍິງ 8 ສະຫາຍນາງ.
ຜູ້ແທນກອງປະຊຸມໃຫຍ່ ໄດ້ດຳເນີນການໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມ ຮາກຖານ ຜ-ຟຟລ ຊຸດໃໝ່. ໂດຍມີຜູ້ລົງສະໝັກຮັບເລືອກຕັ້ງຈຳນວນ 10 ສຫ, ເປັນຍິງ 4 ສະຫາຍນາງ, ເລືອກເອົາ 7 ສະຫາຍ ຜ່ານການໃຊ້ສິດປະຊາທິປະໄຕ ຂອງ ຜູ້ແທນກອງປະຊຸມໃຫຍ່ ສາມາດເລືອກຕັ້ງໄດ້ບັນດາ ສະຫາຍ ດັ່ງລຸ່ມນີ້:
1) ສະຫາຍ ຄານນະຄອນ ເພັງສະຫວັດ
2) ສະຫາຍ ອິນປັນ ບໍລິຫານ
3) ສະຫາຍ ປະກາຍເພັດ ຈັນສະຫວ່າງ
4) ສະຫາຍ ວັນນະກອນ ລຸນທະວົງ
5) ສະຫາຍ ນ. ວົງພອນ ວົງພັກດີ
6) ສະຫາຍ ນ.ສຸພາພອນ ມາດມະນີວົງ
7) ສະຫາຍ ເພັດສະໝອນ ຈັນທະລັງສີ
          ກອງປະຊຸມຄັ້ງປະຖົມມະລຶກຂອງ ຄະນະບໍລິຫານງານ ຊປປລ ຮາກຖານ ບໍລິສັດຜະລິດໄຟຟ້າລາວ ມະຫາຊົນ ສະໄໝທີ II ເລືອກຕັ້ງເອົາ: ສະຫາຍ ຄານນະຄອນ ເພັງສະຫວັດ ເປັນເລຂາ; ສະຫາຍ ປະກາຍເພັດ ຈັນສະຫວ່າງ ເປັນຮອງເລຂາ, ສະຫາຍ ອິນປັນ ບໍລິຫານ ເປັນຮອງເລຂາ, ທັງເປັນປະທານກວດກາ. ເລືອກຕັ້ງເອົາ ສະຫາຍ ນາງ ວົງພອນ ວົງພັກດີ ເປັນຮອງປະທານກວດກາ.
ກອງປະຊຸມໃຫຍ່ ໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຂອງ ສະຫາຍ ຈັນທະເລດ ວໍລະບຸດ ກຳມະການ ຄະນະບໍລິຫານງານ ພັກກະຊວງ, ກຳມະການ ຄະນະບໍລິຫານງານສູນກາງຊາວໜຸ່ມ, ເລຂາຄະນະຄະນະບໍລິຫານງານ ຊາວໜຸ່ມປະຊາຊົນປະຕິວັດລາວ ກະຊວງພະລັງງານ ແລະ ບໍ່ແຮ່. ຊຶ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານ ຄະນະບໍລິຫານງານຊາວໜຸ່ມ ຮາກຖານ ຜ-ຟຟລ ທີ່ຍາດມາໄດ້ຕະຫຼອດໄລຍະເວລາ 3 ປີ ທີ່ຜ່ານມາ, ພ້ອມກັນນີ້ ສະຫາຍ ຍັງໄດ້ເນັ້ນໃຫ້ ຄະນະບໍລິຫານງານຊຸດໃໝ່ ສືບຕໍ່ເອົາໃຈໃສ່ ສຶກສາອົບຮົມການເມືອງ ແນວຄິດ ໃຫ້ສະມາຊິກຊາວໜຸ່ມ ມີທັດສະນະຫຼັກໝັ້ນ, ມີຄຸນສົມບັດ, ສິນທິປະຕິວັດ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ຂອງ ຕົນໃຫ້ສູງຂຶ້ນກວ່າເກົ່າ, ຈັດຕັ້ງປະຕິບັດຂໍ້ແຂ່ງຂັນ 4 ບຸກໃນແຕ່ລະໄລຍະ ໃຫ້ບັນລຸຕາມແຜນທີ່ວາງໄວ້ ພ້ອມທັງຮັກສາມູນເຊື້ອຊາວໜຸ່ມ 4 ບຸກ ຂອງ ຕົນໃຫ້ໜັກແໜ້ນ, ນຳພາ ຊາວໜຸ່ມ ບໍລິສັດ ຜະລິດ-ໄຟຟ້າລາວ ໃຫ້ກາຍເປັນຊາວໜຸ່ມແບບຢ່າງ ໃນການເຄື່ອນໄຫວວຽກງານຕ່າງໆເຊັ່ນ: ວຽກງານວິຊາສະເພາະ, ວຽກງານຂະບວນການ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານຊ່ວຍເຫຼືອສັງຄົມ ແລະ ວຽກງານອື່ນໆ.
ໂດຍ: ຄໍາແສງ ແກ້ວປະເສີດ