ໃນຕອນເຊົ້າຂອງວັນທີ 19 ທັນວາ 2023 ຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່-ເດັກ ກະຊວງພະລັງງານ ແລະ ບໍ່ແຮ່ ໄດ້ຈັດກອງປະຊຸມລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ປະຈຳປີ 2023 ຂື້ນ, ພາຍໃຕ້ຫົວຂໍ້ທີ່ວ່າ: ຮ່ວມກັນ!ລົງທຶນໃສ່ການປ້ອງກັນ ແລະ ຊ່ວຍເຫຼືອແມ່ຍິງ ແລະ ເດັກຍິງ ທີ່ຖືກເຄາະຮ້າຍຈາກຄວາມຮຸນແຮງ, ໂດຍໄດ້ຮັບກຽດເປັນປະທານ ກອງປະຊຸມ ແລະ ໃຫ້ກຽດເຜີຍແຜ່ປະຫວັດຄວາມເປັນມາຂອງວັນດັ່ງກ່າວ ຈາກ ທ່ານ ປອ ສີນາວາ ສຸພານຸວົງ, ຄະນະປະຈຳພັກ, ຮອງລັດຖະມົນຕີ, ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງ ແລະ ທ່ານ ນາງ ບຸນເຫຼືອ ຈັນທະພົມມາ ຫົວໜ້າສູນໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ຍິງລາວ ພ້ອມດ້ວຍແຂກຖືກເຊີນຈາກຫ້ອງການ, ບັນດາກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງແລະ ພະນັກງານອ້ອມຂ້າງກະຊວງເຂົ້າຮ່ວມຢ່າງພ້ອມພຽງ ໃນກອງປະຊຸມ ໄດ້ຮັບຟັງ ຄວາມເປັນມາຂອງວັນສາກົນ ເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ບາງບົດຮຽນກ່ຽວກັບການຈັດຕັ້ງປະຕິບັດວຽກງານ ການປົກປ້ອງ ແລະ ການຊ່ວຍເຫຼືອ ຜູ້ທີ່ຖືກເຄາະຮ້າຍຈາກການໃຊ້ຄວາມຮຸນແຮງ ຈຸດປະສົງກໍ່ເພື່ອປູກຈິດສຳນຶກ ໃຫ້ພະນັກງານ-ລັດຖະກອນ ພາຍໃນກະຊວງ ຮັບຮູ້ ແລະ ເຂົ້າໃຈ ພ້ອມທັງ ຮ່ວມກັນ ຢຸດຕິ ການກະທຳ ທີ່ກໍ່ໃຫ້ເກີດຄວາມຮຸນແຮງຕໍ່ແມ່ຍິງ ແລະ ເດັກນ້ອຍ.
