ທ່ານ ຮອງລັດຖະມົນຕີ ​ສຳ​ເລັດ​ການເຂົ້າຮ່ວມກອງປະຊຸມສະພາມົນຕີ ຄະນະກໍາມາທິການແມ່ນໍ້າຂອງສາກົນ ຄັ້ງທີ 28

ໃນວັນທີ 25 ພະຈິກ 2021 ທີ່ ໂຮງແຮມຄຼາວພລາຊາ ນະຄອນຫຼວງວຽງຈັນ, ທ່ານ ປ​ອ ສິ​ນາ​ວາ ສຸ​ພາ​ນຸ​ວົງ ຮອງລັດຖະມົນຕີກະຊວງພະ​ລັງ​ງານ ແລະ​ ບໍ່​ແຮ່, ໄດ້ເຂົ້າຮ່ວມກອງປະຊຸມສະພາມົນຕີ ຄະນະກໍາມາທິການແມ່ນໍ້າຂອງສາກົນ (ຄມສ) ຄັ້ງທີ 28 ແລະ ກອງປະຊຸມສະພາມົນຕີ ຄມສ ຮ່ວມກັບບັນດາຄູ່ຮ່ວມພັດທະນາ ຄັ້ງທີ 26 ຮ່ວມ​ກັບ​ຄະ​ນະ​ຜູ້​ແທນ ສ​ປ​ປ​ລາວ ທີ່​ນຳ​ພາ​ຄະ​ນະ​ໂດຍ ທ່ານ ນາງ ບຸນ​ຄຳ ວໍ​ລະ​ຈິດ ລັດ​ຖະ​ມົນ​ຕີ​ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ພ້ອມ​ດ້ວຍ​ຄະ​ນະ​ກຳ​ມະ​ການ​ແມ່​ນ້ຳ​ຂອງ​ສາ​ກົນ​ຂອງ ສ​ປ​ປ​ລາວ ໂດຍ​ຜ່ານກອງ​ປະ​ຊຸມ​ທາງ​ໄກ.

ກອງປະຊຸມຄັ້ງນີ້, ສະມາຊິກສະພາມົນຕີ ຄມສ ໄດ້ພ້ອມກັນຮັບຮອງເອົາບັນດາເອກະສານສຳ​ຄັນຄື: 1) ລະບຽບຂອງສະພາມົນຕີ ແລະ ຄະນະກຳມະກາຮ່ວມ ຄະນະກຳມາທິການແມ່ນໍ້າຂອງສາກົນ, 2) ຍຸດທະສາດພັດທະນາເຂື່ອນໄຟຟ້າພະລັງນໍ້າແບບຍືນຍົງ ສໍາລັບອ່າງແມ່ນໍ້າຂອງ. ກອງປະຊຸມຍັງໄດ້ຮັບຟັງການລາຍງານຄວາມຄືບໜ້າ ແລະ ທົບທວນການຈັດຕັ້ງປະຕິບັດວຽກງານໃນໄລຍະຜ່ານມາ

ໂດຍກອງເລຂາ ຄະນະກຳມາທິການແມ່ນໍ້າຂອງສາກົນ ແລະກໍານົດທິດທາງແຜນວຽກໃນຕໍ່ໜ້າຂອງຕົນ. ພ້ອມດຽວກັນນັ້ນ, ກອງປະຊຸມຍັງໄດ້ປຶກສາຫາລື ແລະ ຊຸກຍູ້ບັນດາປະເທດຄູ່ຮ່ວມພັດທະນາ ພິຈາລະນາສືບຕໍ່ໃຫ້ການສະໜັບສະໜູນແກ່ຄະນະກໍາມາທິການແມ່ນໍ້າຂອງສາກົນໃນຕໍ່ໜ້າ ສໍາລັບຈັດຕັ້ງປະຕິບັດບັນດາກິດຈະກຳທີ່ຖືກຮັບຮອງໃນແຜນວຽກໃນສົກປີ 2021-2022 ໃຫ້ໄດ້ຮັບຜົນດີ ແລະ ມີປະສິດທິຜົນສູງ.