ພາຍຫຼັງຊຸດຝຶກອົບຮົມດັ່ງກ່າວໄດ້ດຳເນີນມາເປັນໄລຍະເວລາ 10 ວັນຄື: ແຕ່ວັນທີ 9-19 ມັງກອນ 2024 ກໍ່ໄດ້ປິດລົງຢ່າງຈົບງາມ ໂດຍໃຫ້ກຽດເຂົ້າຮ່ວມຂອງ ສະຫາຍ ປອ ສີນາວາ ສຸພານຸວົງ ຄະນະປະຈໍາພັກ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ສະຫາຍ ປອ ວິສຸກ ພົມພິທັກ ກຳມະການຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ. ມີຄະນະປະຈຳພັກ, ຄະນະບໍລິຫານງານພັກ ແລະ ນັກມະນາກອນ ທີ່ມາຈາກໜ່ວຍພັກຫ້ອງການກະຊວງ, ບັນດາກົມ, ສະຖາບັນ, ລັດວິສາຫະກິດ ແລະ ພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ເຂົ້າຮ່ວມ.
ໃນພິທີ ສະຫາຍ ທອງຂັນ ພິມວິໄລ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ລາຍງານຜົນສຳເລັດການຈັດຕັ້ງປະຕິບັດການຈັດຊຸດຝຶກອົບຮົມ ວຽກງານຈັດຕັ້ງ, ກໍ່ສ້າງພັກ ແລະ ພະນັກງານ ໄລຍະສັ້ນ ໃຫ້ພະນັກງານຫຼັກແຫຼ່ງອ້ອມຂ້າງກະຊວງວ່າ: ຊຸດຝຶອົບຮົມຄັ້ງນີ້ ເປັນຊຸດທີ III ໂດຍມີການຄົ້ນຄວ້າ 15 ຫົວຂໍ້ຄື: 1. ທັດສະນະຂອງພັກເຮົາ ກ່ຽວກັບວຽກງານກໍ່ສ້າງພັກ; 2. ລະບົບການເມືອງຂອງ ສປປ ລາວ ໃນເງື່ອນໄຂໃໝ່; 3. ແບບແຜນນໍາພາ ແລະ ຫຼັກການລວມສູນປະຊາທິປະໄຕຂອງພັກ; 4. ການດໍາເນີນຊີວິດຂອງໜ່ວຍພັກ; 5. ຍົກສູງຄຸນນະພາບຂອງການຈັດຕັ້ງຮາກຖານພັກ; 6. ຍົກສູງຄຸນນະພາບວຽກງານຄຸ້ມຄອງສະມາຊິກພັກ; 7. ຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກ; 8. ກ່ຽວກັບວຽກງານປ້ອງກັນພັກ-ພະນັກງານໃນໄລຍະໃໝ່; 9. ການກະກຽມ ແລະ ດໍາເນີນກອງປະຊຸມໃຫຍ່ຂອງພັກ; 10. ທິດສະດີກ່ຽວກັບວຽກງານຈັດຕັ້ງ ແລະ ການສ້າງໂຄງຮ່າງການຈັດຕັ້ງ; 11. ທັດສະນະຂອງພັກຕໍ່ພະນັກງານ ແລະ ຕໍ່ວຽກງານພະນັກງານ; 12. ກ່ຽວກັບວຽກງານຄຸ້ມຄອງພະນັກງານ; 13. ການສ້າງແຜນກໍານົດພະນັກງານນໍາພາ-ຄຸ້ມຄອງ; 14. ການສ້າງແຜນກໍ່ສ້າງ-ບໍາລຸງພະນັກງານນໍາພາ-ຄຸ້ມຄອງ ແລະ 15. ການສ້າງມາດຕະຖານພະນັກງານ.
ພາບ ແລະ ຂ່າວ: ວຽງສະຫວັນ ປຣະດິດ
ຮຽບຮຽງ: ຄຳແສງ ແກ້ວປະເສີດ
Website: mem.gov.la
ສາຍດ່ວນ: 1506
