ສປປ ລາວ, ຄືກັນກັບຫຼາຍປະເທດໃນໂລກ ທີ່ຈະໄດ້ຮຽນຮູ້ກ່ຽວກັບການມາດຖານການຕິດຕັ້ງ ແລະ ຄຸ້ມຄອງສະຖານີສາກລົດໄຟຟ້າ. ສປປ ລາວ ໄດ້ສ້າງ ແລະ ຮັບຮອງ ຂໍ້ຕົກລົງການຄຸ້ມຄອງທຸລະກິດສະຖານີສາກ ແລະ ຂໍ້ກໍານົດການຕິດຕັ້ງສະຖານີສາກສາທາລະນະ ແລະ ການສາກທີ່ຢູ່ອາໄສ. ໃນການສ້າງຂໍ້ກໍານົດເຫຼົ່ານີ້ແມ່ນອີງໃສ່ຄວາມຕ້ອງການເພື່ອເປັນການສົ່ງເສີມການນໍາໃຊ້ລົດໄຟຟ້າ ຢູ່ ສ ປປ ລາວ ນີ້ກໍເພື່ອຮັບປະກັນຄວາມປອດໄພ ແລະ ຄວາມສອດຄ່ອງສໍາລັບຜູ້ບໍລິໂພກ.
ເຖີງຢ່າງໃດກໍ່ຕາມ, ສ ປປ ລາວ ກໍຍັງມີຄວາມທ້າທ້າຍດ້ານປະສົບການໃນການທົດສອບ ແລະ ການກວດສອບຄວາມຖືກຕ້ອງຂອງເຕັກໂນໂລຊີສະຖານີສາກ. ດັ່ງນັ້ນ, ກະຊວງພະລັງງານ ແລະ ບໍ່ແຮ່ ຮ່ວມກັບ ລັດວິສາຫະກິດໄຟຟ້າລາວ ໄດ້ເຂົ້າຮ່ວມກັນສ້າງຂີດຄວາມອາດສາມາດ ໃນການທົດສອບ ແລະ ກວດສອບຄຸນນະພາບສະຖານີສາກໄຟລົດໄຟຟ້າ ເປັນເວລາ 05 ວັນ ທີ່ບາງກອກ ປະເທດ ໃນວັນທີ 8 ຫາ 12 ກໍລະກົດ 2024 ໃນການອົບຮົມຄັ້ງນີ້ແມ່ນໄດ້ຮັບ ການສະໝັບສະໜູນຈາກອົງການພັດທະນາສາກົນຂອງປະເທດສະຫະລັດອາເມລິກາ (USAID) ໂດຍມີຜູ້ເຂົ້າຮ່ວມທັງໝົດ ຈໍານວນ 05 ທ່ານ ຈາກກົມສົ່ງເສີມ ແລະ ປະຢັດພະລັງງານ 02 ທ່ານ, ສະຖາບັນຄົ້ນຄວ້າພະລັງງານ ແລະ ບໍ່ແຮ່ 01 ທ່ານ ພ້ອມດ້ວຍ ລັດວິສາຫະກິດໄຟຟ້າລາວ 02 ທ່ານ. ພາຍຫລັງ ຈາກການອົບຮົມໃນຄັ້ງນີ້ ຈະໄດ້ມີການຖ່າຍທອດຄວາມຮູ້ໃຫ້ວິຊາການ ຢູ່ ສປປ ລາວ.
ພາບ ແລະ ຂ່າວ: ກົມສົງເສີມ ແລະ ປະຢັດພະລັງງານ
Website: www.mem.gov.la
ສາຍດ່ວນ: 1506
