ໃນວັນທີ 30 ມິຖຸນາ 2023, ຢູ່ທີ່ໂຮງແຮມ ອາມາຣີ (Amari) ເມືອງ ວັງວຽງ, ແຂວງ ວຽງຈັນ ກົມສົ່ງເສີມ ແລະ ປະຢັດພະລັງງານ, ກະຊວງພະລັງງານ ແລະ ບໍ່ແຮ່ ຮ່ວມກັບ ອົງການ ອ໋ອກຟາມ ປະຈຳ ສປປ ລາວ ໄດ້ຮ່ວມກັນຈັດກອງປະຊຸມປຶກສາຫາລື ກ່ຽວກັບ ການຮ່ວມມືວາງແຜນ ແລະ ຈັດຕັ້ງປະຕິບັດໂຄງການສົ່ງເສີມການຫັນໄປສູ່ການນຳໃຊ້ພະລັງງານສະອາດ ແບບມີສ່ວນຮ່ວມໃນ ສປປ ລາວ (Influence-Just Energy Transition in Lao PDR) ໂດຍການເປັນປະທານຮ່ວມຂອງ ທ່ານ ຈັນໂທ ມີລັດຕະນະແພງ, ຫົວໜ້າກົມສົ່ງເສີມ ແລະ ປະຢັດພະລັງງານ ແລະ ທ່ານ ທັດສະພອນ ບຸດສະຫຼິງ, ຜູ້ອຳນວຍການອົງການ ອ໋ອກຟາມ ປະຈຳ ສປປ ລາວ ເຊິ່ງມີຜູ້ຕາງໜ້າຈາກບັນດາກົມອ້ອມຂ້າງພາຍໃນກະຊວງພະລັງງານ ແລະ ບໍ່ແຮ່, ບັນດາກະຊວງ ແລະ ສະມາຄົມທີ່ກ່ຽວຂ້ອງເຂົ້ົ້າຮ່ວມຈຳນວນ 30 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນຄວາມຄິດເຫັນໃນການຮ່ວມມືວາງແຜນ ແລະ ຈັດຕັ້ງປະຕິບັດໂຄງການສົ່ງເສີມການຫັນໄປສູ່ການນຳໃຊ້ພະລັງງານສະອາດແບບມີສ່ວນຮ່ວມໃນ ສປປ ລາວ ຈາກບັນດາຜູ້ເຂົ້າຮ່ວມ.
ພ້ອມກັນນີ້, ຜູ້ເຂົ້າຮ່ວມກອງປະຊຸມ ຍັງໄດ້ຮັບຟັງການນຳສະເໜີ ກ່ຽວກັບບ ນະໂຍບາຍ ແລະ ແຜນຍຸດທະສາດສົ່ງເສີມການຫັນໄປສູ່ການນຳໃຊ້ພະລັງງານສະອາດໃນ ສປປ ລາວ; ສະພາບລວມຂອງວຽກງານການສົ່ງເສີມການຫັນໄປສູ່ການນຳໃຊ້ພະລັງານສະອາດແບບມີສ່ວນຮ່ວມໃນອາຊີ ແລະ ສປປ ລາວ; ປະຫວັດຄວາມເປັນມາ, ຈຸດປະສົງ ແລະ ແຜນຈັດຕັ້ງປະຕິບັດໂຄງການສົ່ງເສີມພະລັງງານສະອາດແບບມີສ່ວນຮວ່ມໃນ ສປປ ລາວ ພ້ອມດຽວກັນນັ້ນ ກໍ່ໄດ້ມີການແລກປ່ຽນບົດຮຽນ ແລະ ປະສົບການຈາກບັນດາຜູ້ເຂົ້າຮ່ວມທີ່ີມີປະສົບການ ກ່ຽວກັບ ການກຳນົດໜ້າວຽກ, ແຜນກິດຈະກຳ ເຊິ່ງຈະປຶກສາຫາລືກັນລະອຽດຕື່ມ ເພື່ອວາງແຜນໃນການຈັດຕັ້ງປະຕິບັດໂຄງການ ໃຫ້ເກີດປະໂຫຍດ ແລະ ມີປະສິດທິຜົນສູງ.
ພາບ ແລະ ຂ່າວ: ກົມສົ່ງເສີມ ແລະ ປະຢັດພະລັງງານ
ຮຽບຮຽງ: ຄຳແສງ ແກ້ວປະເສີດ
