ກອງປະຊຸມປຶກສາຫາ ຄວາມເປັນໄປໄດ້ກ່ຽວກັບ ການພັດທະນາພະລັງງານ ໄຮໂດຼເຈນຂຽວ ແລະ ແອມໂມເນຍຂຽວ ຢູ່ ສປປ ລາວ ໄດ້ຈັດຂຶ້ນໃນວັນທີ 21 ກໍລະກົດ 2023 ພາຍໃຕ້ການເປັນປະທານຂອງ ທ່ານ ປອ ສີນາວາ ສຸພານູວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ມີບັນດາ ທ່ານ ຫົວໜ້າ-ຮອງກົມ, ສະຖາບັນ ແລະ ລັດວິສາຫະກິດອ້ອມຂ້າງກະຊວງ ພ້ອມດ້ວຍທີມງານຜູ້ຄົ້ນຄວ້າການຮ່ວມມືທາງດ້ານເສດຖະກິດ ຈາກສະຖານທູດ ຍີ່ປຸ່ນ ປະຈໍາລາວ ເຂົ້າຮ່ວມຢ່າງພ້ອມພຽງ.
ໂຄງການດັ່ງກ່າວນີ້, ເປັນການສຶກສາຄວາມເປັນໄປໄດ້ໃນການພັດທະນາພະລັງງານ ແກ໊ສ ສີຂຽວ ໃນ ສປປ ລາວ ທີ່ໃຫ້ຄວາມສົນໃຈໃນການສຶກສາຈາກບໍລິສັດ ທີທີຊີແອວ (TTCL)ຈໍາກັດ ມະຫາຊົນ, ເຊິ່ງຖືວ່າເປັນບໍລິສັດ ທີ່ໃຫ້ຄວາມສົນໃຈໃນການພັດທະນາພະລັງງານສະອາດ ເປັນມິດຕໍ່ກັບສິ່ງແວດລ້ອມ. ເພື່ອເປັນການພັດທະນາ ຂົງເຂດການຮ່ວມມືກັນທາງດ້ານພະລັງງານກໍຄືພະລັງງານທາງເລືອກ ທີ່ມີບົດບາດສໍາຄັນເຂົ້າໃນ ເສດຖະກິດ- ສັງຄົມ ແລະ ນອກຈາກນີ້ຍັງຖືໄດ້ວ່າເປັນໂຄງການສຶກສາ ແລະ ຄົ້ນຄວ້າຂອງການຫັນປ່ຽນພະລັງງານໃນຮູບແບບໃໝ່ ແລະ ເປັນພະລັງງານທີ່ມີຄວາມສະອາດ, ຕາມແນວທາງນະໂຍບາຍຂອງພັກ-ລັດ ກໍ່ຄືແຜນພັດທະນາ ເສດຖະກິດ-ສັງຄົມຂອງຂະແໜງພະລັງງານ ແລະ ບໍ່ແຮ່.
ທ່ານ ປອ ສີນາວາ ສຸພານຸວົງ ກ່າວວ່າ: ປັດຈຸບັນພວກເຮົາແມ່ນຢູໃນຍຸກ ຂອງການຫັນປ່ຽນເປັນພະລັງງານສີຂຽວ (GX: Green Transformation), ການຫັນປ່ຽນທາງດ້ານເສດຖະກິດ-ສັງຄົມ, ນີ້ແມ່ນເປັນການຫັນປ່ຽນໄປສູ່ສັງຄົມທີ່ຫຼຸດຜ່ອນການປ່ອຍທາດອາຍອາບອນ (Decarbonized). ທີ່ເກີດຂື້ນຈາກການນໍາໃຊ້ນໍ້າມັນເຊື້ອໄຟຟອດຊິວ, ອາຍແກັສ ທໍາມະຊາດ ແລະ ຖ່ານຫີນ, ເຊິ່ງເປັນແຫຼ່ງພະລັງງານທີ່ນິຍົມກັນໃຊ້ຢ່າງແພ່ຫຼາຍໃນທົ່ວໂລກ. ສະນັ້ນ, ການຫັນປ່ຽນເປັນພະລັງງານສະອາດ, ພະລັງງານທົດແທນກໍ່ຖືກເປັນທາງເລືອກໜື່ງເຊັ່ນ: ການຜະລິດ ພະລັງງານ ໄຮໂດຼເຈນ ແລະ ແອມໂມເນຍ.
ທ່ານ SHIMANO Yoichi ຫົວໜ້າທີມງານຜູ້ຄົ້ນຄວ້າການຮ່ວມມືທາງດ້ານເສດຖະກິດ, ສະຖານທູດ ຍີ່ປຸ່ນ ປະຈໍາ ສປປລາວ ໃຫ້ຮູ້ວ່າ: ເມື່ອຫວນຄືນໃນປະຫວັດສາດ, ຜູ້ຜະລິດພະລັງງານອຸດສາຫະກໍາທີ່ສໍາຄັນຂອງໂລກເປັນຕົ້ນແມ່ນ ປະເທດ ອັງກິດ ເຊິ່ງມີການນໍາໃຊ້ຖ່ານຫີນເປັນພະລັງງານໃນລະຫວ່າງການປະຕິວັດອຸດສາຫະກໍາໃນສະຕະວັດທີ 18. ຫຼັງຈາກສິ້ນສຸດ ຂອງສົງຄາມໂລກຄັ້ງທີ II, ກໍເປັນຍຸກກ່າວເຂົ້າໄປສູ່ຂອງການນໍາໃຊ້ນໍ້າມັນທີ່ Saudi Arabia ແລະ ຈາກນັ້ນ ກາຕາ ກໍ່ມີການນໍາໃຊ້ LNG ເກີດຂື້ນ. ໃນປັດຈຸບັນ, ແມ່ນມີຄວາມພະຍາຍາມທີ່ຈະຫັນປ່ຽນການນໍາໃຊ້ ແລະ ການຜະລິດພະລັງງານທີ່ສະອາດຄື: ພະລັງງານໄຮໂດຼເຈນ ແລະ ແອມໂມເນຍ. ແຕ່ການຜະລິດພະລັງງານ ດັ່ງກ່າວແມ່ນຍັງມີຄວາມຈໍາກັດຢູ່ໃນໂລກ. ເຊີ່ງຄຽງຄູ່ກັນນັ້ນ, ບັນດາປະເທດ ອົດສະຕຣາລີ, ຕາເວັນອອກ ກາງ, ສະຫະລັດອາເມລິກາ, ຊີລີ ແລະ ສປປ ລາວ, ທີ່ມີທ່າແຮງທາງດ້ານສັກກະຍະພາບພະລັງງານໄຟຟ້ານ້ໍາຕົກ ທີ່ອຸດົມສົມບູນອັນສໍາຄັນ. ຕາມທີ່ປະເທດລາວໄດ້ຖືກເອີ້ນວ່າ “ແບັດເຕີຣີຂອງອາຊີ”, ສ້າງລາຍໄດ້ຈາກການສົ່ງ ຂາຍໄຟຟ້າອອກຕ່າງປະເທດ. ເຖິງຢ່າງໃດກໍຕາມ, ການໄດ້ຮັບຜົນປະໂຫຍດຈາກໄລຍະແຫ່ງການຫັນປ່ຽນຄັ້ງ ຍິ່ງໃຫຍ່ນີ້, ລາວມີເປົ້າໝາຍທີ່ຈະນໍາໃຊ້ກະແສໄຟຟ້າທີ່ຜະລິດຈາກແຫຼ່ງທີ່ບໍ່ແມ່ນຟອດຊິວເຊັ່ນ:: ໄຟຟ້ານ້ໍາຕົກ, ພະລັງງານແສງຕາເວັນ ແລະ ພະລັງງານລົມ ທີ່ເປັນຊັບພະຍາກອນທາງທໍາມະຊາດ. ສປປ ລາວ ຍັງມີຄວາມ ພະຍາຍາມໃຫມ່ທີ່ຈະສ້າງຕັ້ງອຸດສາຫະກໍາໃຫມ່ ສໍາລັບການຜະລິດພະລັງງານສະອາດ ເຊັ່ນ: ໄຮໂດຼເຈນ ແລະ ແອມໂມເນຍ, ທີ່ເປັນການດຶງດູດບັນດາບໍລິສັດ ແລະ ນັກລົງທືນຜູ້ທີ່ມີຄວາມສົນໃຈທາງດ້ານ ອຸດສາຫະກໍາ ການຜະລິດ ພະລັງງານສະອາດທີ່ມີຊື່ສຽງທີ່ຈະເຂົ້າມາລົງທືນພາຍໃນປະເທດ, ເປັນການສ້າງລາຍຮັບ ແລະ ວຽກເຮັດງານທໍາໃຫ້ກັບປະຊາຊົນ, ເພີ່ມລາຍຮັບຈາກພາສີ, ແລະ ຍັງມີຄວາມສົມດຸນ ແລະ ພຽງພໍທາງດ້ານພະລັງງານອີກດ້ວຍ.
ພາບ ແລະ ຂ່າວ: ວຽງສະຫວັນ ປຣະດິດ
ຮຽບຮຽງ: ຄຳແສງ ແກ້ວປະເສີດ
